Kim Mehmeti: Thaçi po e kopjon idenë e ndarjes nga Dobrica Qosiq

Shkrimtari dhe analisti shqiptar nga Maqedonia Veriore, Kim Mehmeti, thotë se Presidenti i Kosovës, Hashim Thaçi, idenë e tij për “korrigjim të kufijve” e ka të kopjuar nga një ide e moçme e akademikut serb, Dobrica Qosiq, për ndarjen e Kosovës në vija etnike. Me këtë, Mehmeti, thotë se nëse Thaçi vazhdon ta promovojë këtë ide, ai u shërben “politikave të vjetra serbe”.

Në një intervistë të gjatë për KALLXO.com, analisti shqiptar nga Shkupi ka folur edhe për marrëveshjen e fundit të arritur në mes Maqedonisë Veriore dhe Greqisë, për dialogun ndërmjet Kosovës dhe Serbisë dhe idenë e bashkimit në mes Kosovës dhe Shqipërisë.

“Problemi që hapet tashti në Kosovë, është t’ju bëjë shërbim serbëve, politikave serbe, ja pse. Mundet Serbia ta hapë këtë temë, por Kosova kurrë s’duhet ta hapë këtë problem”, ka thënë Mehmeti për KALLXO.com.

“Kosovarët, rinia e kosovarëve ndoshta nuk e din por, ideja serbe për ndarje, shkëmbim territoresh mes shqiptarëve dhe serbëve është e vjetër sa vetë shqiptaria, dhe ideologu i parë i saj është  Dobrica Qosiq. Presidenti i juaj vetëm e kopjon atë ide serbe dhe thash këtë mund ta bëjnë qarqet serbe, sepse ata nuk kanë problem tjetër ata nuk kanë të pa gjetur, atyre nuk ua rrafshoi vendbanimet rrafsh me tokë dhe ata mund të dalin me ide që e zgjidhim problemin e Kosovës dhe se i korrigjojmë kufijtë. Por, këtë nuk mund ta bëjë asnjë politikan, duhet të jetë mbi mesataren ndonjë politikan kosovar që mendon se ai duhet ta hapë këtë temë dhe që ai duhet ta mbështes këtë temë”, ka thënë ai.

Sipas Kim Mehmetit, dialogu ndërmjet Republikës së Kosovës dhe asaj të Serbisë kishte vetëm një qëllim- ta lodhë popullin kosovar nga pritjet që një ditë do të bëhet mirë.

“Qëllimi ishte ky, që populli kosovar të lodhet, të lodhet nga kërkuari formulë sesi do të zgjidhet me komunat serbe, çfarë do bëhet dhe që të vijë koha që tani vetë populli shqiptarë në Kosovë nga lodhja të thotë bëni çfarë doni vetëm një ditë të na lini të qetë”, tha Mehmeti.

Ai ka folur edhe për ekipin e formuar nga Qeveria e Kosovës për dialogun me Serbinë, taksën 100 për qind të vendosur nga ekzekutivi kosovar dhe situatën politike në shtetin e Maqedonisë.

KALLXO.com: Si i lexoni zhvillimet e fundit në rajon me arritjen e marrëveshjes së emrit mes Maqedonisë Veriore dhe Greqisë dhe sa besoni se do t’i kontribuoj paqes rajonale kjo marrëveshje?

Kim Mehmeti: Shpesh herë ka ndodhur që marrëveshjet e nënshkruara në Ballkan në këto hapësira, vetëm i kanë shtuar mosmarrëveshjet apo marrëveshjet e nënshkruara këtu shpërfaqin edhe probleme që në të vërtetë nuk mund të zgjidhen. Kjo vjen nga pak edhe shkaku i asaj që marrëveshjet në Ballkan kurrë nuk kanë shprehur me të vërtetë marrëveshjen në mes dy popujve por më së shpeshti kanë shprehur marrëveshjet në mes të mëdhenjve, në mes kryeqendrave botërore që vendosin për fatin e popujve të vegjël. Nga ky këndvështrim unë e shoh edhe këtë marrëveshje, edhe kjo nuk është marrëveshje mes Greqisë dhe Maqedonisë, më shumë është marrëveshje mes forcave që kanë ndikim në Ballkan edhe asaj luftës se kush do ta fitojë lojën.

Shikuar nga ky këndvështrim, mendoj se nuk është marrëveshje e cila nuk garanton të ardhme stabile për këtë shtet. Pse e them këtë? Sepse ju nuk duhet harruar kurrë se në referendumin për a do të pranohet ndryshimi i emrit, shumica e popullit maqedonas ishin kundër. Dhe tani shtohet pyetja sa do të amortizohet sa do të zbutet ai qëndrim i popullit maqedonas kundër ndryshimit të emrit të vet. Aq më shumë kur unë mendoj se në Maqedoni dhe nuk bëhet fjalë gjithaq për emrin e shtetit se sa për etninë, se sa për atë se kush janë trashëgimtaret e maqedonasve antikë. Në të vërtetë kjo është vetëm fillimi, sipas meje, i asaj që nuk mund populli maqedonas të pretendojë edhe ta mbajë atë emër, sepse ai emërtim nënkupton se je trashëgimtari i një populli krejt tjetër, kjo nuk ka të bëjë me sllavë. Kështu që, i gjithë problemi është pak më i ndërlikuar sesa që shihet në sipërfaqe. Diçka e ngjashme si në Bosnje për shembull, ju e keni Marrëveshjen e Dejtonit, por çfarë u funksionon në shtet? Kurrgjë thuajse. Dhe, thuajse se asgjë nuk ka të bëjë më me atë marrëveshje.

Ju e keni marrëveshjen edhe për Kosovën, po e shiheni tashti se ku kthehet loja. Kthehet thuajse në fillim, thuajse se asgjë nuk ka ndodhur, thuajse atë shtet nuk e kanë pranuar 130 e sa shtete tjera, thuajse se tashti është pritur që të rritet Presidenti që të vijë puna deri te një marrëveshje tjetër. Sepse këtu, sa koka ka aq marrëveshje dalin. Këtu edhe marrëveshjet janë sezonale në Ballkan nuk janë marrëveshje të përjetshme, siç i kemi në perëndim që betonohem. Jo, këtu dalin ca budallenj, del një garniturë e re politikanësh dhe kthen prapë këtë çështje, e kthen në diskutim emrin.

Siç ndodhi tashti me Kosovën, siç ndodh tash edhe me Bosnjën e Hercegovinën ku keni ju atë si qartazi kërkojnë bashkimin e Republikës Serbe me Serbinë, siç keni ju budallenjtë në Kosovë që thonë se është mirë të korrigjojmë kufijtë, a harrojmë që korrigjimi i kufijve të Kosovës shtron pyetjen atë çfarë me atë të Maqedonisë?

KALLXO: Kohëve të fundit janë shtuar zërat për krijimin e modelit të marrëveshjes mes Maqedonisë dhe Greqisë në dialogun mes Kosovës dhe Serbisë. Sa besoni që është legjitim që Kosova dhe Serbia të vendosin paqe mes vete duke u bazuar në marrëveshjen e Prespës?

Kim Mehmeti: Ai (modeli) nuk mund të kopjohet se s’ka të bëjë me të njëjtin problem. Atje problemi siç e shtron tani Presidenti i Kosovës del që është problem territorial. Këtu nuk kishte problem territorial, kufijtë ishin të fiksuar, këtu bëhej fjalë për emrin. Ky problem mund të barazohet vetëm në një rrafsh, se për këto probleme nuk vendosim ne, por vendosin të tjerët, mirëpo edhe kur është kështu ju duhet ndershëm ta luani lojën e juaj.

Shihni, problemi që hapet tashti në Kosovë, është t’u bëjë shërbim serbëve, politikave serbe. Jja pse! Mundet Serbia ta hapë këtë temë, por Kosova kurrë s’duhet ta hapë këtë problem. Pse? Se problemet e para që i ka Kosova me Serbinë janë, problemi i të pagjeturve, problemi i kërkim faljeve, problemi i dëmshpërblimit. Ju në momentin kur e hapeni këtë çështje e barazoni kriminelin me ju, me viktimën. Dhe, domethënë, ia harroni të gjitha këto që duhet të bëjë ajo paraprakisht dhe menjëherë e sillni në rrafshin ku ishte në vitet e ‘90-ta. Ju edhe me Millosheviqin mundët ta evitoni luftën nëse do të pranonit këso marrëveshjesh.

Kosovarët, rinia e kosovarëve ndoshta nuk e din por, ideja serbe për ndarje, shkëmbim territoresh mes shqiptarëve dhe serbëve është e vjetër sa vetë shqiptaria, dhe ideologu i parë i saj është  Dobrica Qosiq. Presidenti i juaj vetëm e kopjon atë ide serbe dhe thash këtë mund ta bëjnë qarqet serbe, sepse ata nuk kanë problem tjetër ata nuk kanë të pa gjetur, atyre nuk ua rrafshoi vendbanimet rrafsh me tokë dhe ata mund të dalin me ide që e zgjidhim problemin e Kosovës dhe se i korrigjojmë kufijtë. Por, këtë nuk mund ta bëjë asnjë politikan, duhet të jetë mbi mesataren ndonjë politikan kosovar që mendon se ai duhet ta hapë këtë temë dhe që ai duhet ta mbështesë këtë temë.

Për arsye shumë të thjeshta thash, sepse ti ke të pagjetur, ti ke 1 mijë probleme që para kësaj duhet Serbia, duhet të dalë të kërkojë falje mos më shumë, që të vijë puna. Dhe, duhet të pranohen dy shtete të barabarta dhe sovrane e të diskutojnë mbi kufijtë, nuk diskuton për kufijtë krimineli, ai që të ka bë krime edhe viktima, kjo nuk ndodh. Mirëpo kjo te ne ndodh, e dini pse? Se politikanët tanë mendojnë kështu, thonë unë ta solla lirinë, unë ta solla pavarësinë, unë tani mund të shes edhe territore. Kjo është logjika e mendësisë bajraktareske, se unë, unë, unë i bëra të gjitha, unë do t’i bëj të gjitha edhe ne shqiptarët derisa të jenë ata gjallë del që duhet t’u paguajmë haraç, të presim se çfarë, sepse ajo është mendësi që barazon fatin e shtetit, fatin e popullit me fatin e vet politik, sepse mbas kësaj mos harroni me ardhjen e ndonjë marrëveshjeje e tillë u shtohet afati i përdorimit politikan aktiv i kësaj klase politike. Sepse ata deri nesër do të dalin nëpër këngë popullore si na e zgjodhët, si na prutë Preshevën në Kosovë, se do na çojnë të harrojmë se çfarë kanë dhanë, aq më shumë ata tallen me inteligjencën tonë.

A e dini çfarë thonë, ne do e marrim Preshevën, Luginën e Preshevës e që del, don të thotë: O budallenj neve Serbia nuk na njeh pse nuk duam ta marrim Preshevën, se ditën që do e marrim Preshevën, Serbia do na e njohë si shtet. Kaq tallen me inteligjencën tonë saqë sillen thuajse përballë atyre ka një grumbull budallenjsh që nuk kuptojnë kurrgjë dhe ata si të çuar prej Perëndisë që lirinë, të gjitha u takojnë atyre dhe do na e japin edhe lirinë si në barnatore, në sasi të vogla që mos të helmohemi, edhe shtetformësinë ata do na japin, edhe gjithmonë do na frikësojnë me atë se kështu ka thënë amerikanët, kështu duhemi miqtë tanë, gjithmonë ata na tregojnë se çfarë duan miqtë tanë, kurrë nuk pyeten se çfarë duam ne.

KALLXO: Në fakt, do t’i kthehemi edhe një herë korrigjimit të kufijve por, të kthemi pak në kohë. Që nga viti 2011 Kosova dhe Serbia zhvillojnë dialog. Filloi si teknik u pasua me politik, tash nga  vera e kaluar është përmend edhe korrigjimi i kufijve. si e shihni ju ecurinë e dialogut në mes Kosovës dhe Serbisë, a ka quar në normalizim të raporteve apo është thanë tërë kohën e nuk është arritur ajo që është thënë?

Kim Mehmeti: Ai dialog pati vetëm një qëllim dhe e arriti atë qëllim sipas meje, dhe që nuk them këtë sot por e kam thënë këtë qysh atëherë janë argumentet që ishin. Qëllimi ishte ky, që populli kosovar të lodhet, të lodhet nga kërkuari formulë sesi do të zgjidhet me komunat serbe, çfarë do bëhet dhe që të vij koha që tani vetë populli shqiptarë në Kosovë nga lodhja të thotë bëni çfarë doni vetëm një ditë të na lini të qetë.

Duhet të jemi të drejtë, kjo ju duhej edhe elitave politike serbe, që ta lodhin popullin e vet me çështjen si me Kosovën ku me Kosovën, është e pavarur s’është e pavarur. Dhe tani kur u afrua baraspesha e lodhjes, do të thoja, ku më të rraskapitur janë shqiptarët e Kosovës dhe këtë nuk e them se jam shqiptar por se ashtu i lënë vetëm të mbyllur në një gropë edhe shkaku kësaj Unioni Evropian i la të mbyllur që të lodhen dhe të kërkojnë shpëtim, dhe njeriu që kërkon shpëtim nuk pyet shumë sesi shpëtova e ku shpëtova, por thotë vetëm le të shpëtoj po jep çka të jepet. Dhe ky është efekti i dialogut.

Pse, u fillua me atë sesi të inkuadrohen serbët, si veriu të inkuadrohet në Kosovë, por asnjëherë nuk është biseduar për atë, por është biseduar gjithmonë, edhe të huajt edhe serbët edhe kosovarëve, ua kanë shtruar pyetjen se çfarë mund të u jepni njëri tjetrit. Por, çfarë mundet Kosova t’i japë Serbisë më shumë se ata 10 mijë të vrarë, çfarë mund t’i japë Kosova Serbisë më shumë se ato 10 mijë femra, gra e motra tonat të dhunuara, çfarë mund t’i japë më shumë Kosova se ato fshatra të rrafshuara me tokë, çfarë mund t’u japë më shumë se shkatërrimin e çdo gjëje që ishte e vlefshme edhe në kontekstin historik, çfarë duhet të japë më shumë? Kjo është me të vërtetë sikur, nuk dua të bëj paralele tekstuale, sikur para Luftës së Dytë Botërore të shtrohej pyetja se çfarë duhej Gjermanisë t’i jepet diçka nga Perëndimi që të arrihet një marrëveshje e mirë.

E së pari herë ndodh në histori që ai që e ka, të them kriminelit, t’i shtohet pyetja çfarë mund t’i japim edhe diçka që të arrihet një baraspeshë, mirëpo kjo ndodhi për një arsye dhe nuk duhet të fajësojmë për këtë asnjeri. Ne bëmë luftë me heronjtë të cilët kishin trimërinë dhe s’duhet kurrkush që t’ua harrojë dhe mohojë, por ne harruam se trupi i luftës nuk mund të jetë edhe politikan. Por te ne çfarë ndodhi, ata që ishin të pashkolluar disa nga ta që u shpallen gjeneralë gjatë luftës, pas luftës u shpallen politikanë të diplomuar, tash janë negociatorë ndërkombëtarë të diplomuar. Po kjo është e pamundur, kjo është edhe e panatyrshme. Pastaj, ju shihni te popujt tjerë, shihni te maqedonasit tanë, bashkëkombësit e mi, kjo është gjenerata e katërt e burrështetasve që ndërrohen, te ne ata janë prej 90-tës deri më sot, se te ne nëse e trashëgon një vend një kolltuk në shtet nuk e jep më, nuk e jep. E shkatërron shtetin e nuk e jep, dhe kjo është ajo nuanca që neve na bën pak më të lëndueshëm e më të manipulueshëm edhe që edhe faktori ndërkombëtar e lexoi mirë, se shqiptarët kërkojnë burrështetas që t’i mbajnë urtë të vetët, sepse shqiptari është e kundërta e asaj që thuhet për qenin e mirë. Burrështetasi shqiptar e leh të vetin dhe e kafshon të vetin por i lëpihet të huajit, dhe këta të tanët janë shumë të mirë për të huajt, por janë shumë të rrezikshëm për ne, sepse burrështetasi shqiptar të lë pa bukë, të detyron ta braktisësh vendlindjen, mirëpo të huajit i përkulet. Ju a e shihni Presidenti i Kosovës sa i mirë është në ato takimet ndërkombëtare, sesi sillet edhe ndaj Presidentit serb, mirëpo shiheni sesi sillet ndaj cilitdo shqiptar që e kritikon.

Shyqyr që jetojmë në një botë të hapur të internetit, se këta edhe do të kishin eliminuar kundërshtarët, Enver Hoxha do të ishte nxënës i keq për këta, por këtyre koha dhe rrethanat nuk ua lejon diçka të atillë, por nëse e shihni, mendësia është ajo. Nëse ti e kritikon, ai të eliminon me të gjitha, s’mund të punësohesh, s’mund të dalësh nëpër mediat e tij, s’mund të bësh asgjë, dhe ky është eliminim. Dhe, çfarë të çon, të çon të ikësh prej shtetit. Dikur Enveri vriste kundërshtarët e vet politikë, por këta edhe në Shqipëri edhe në Kosovë të detyrojnë të ikësh, dhe prandaj Kosova është zbrazë Shqipëria është zbrazë, edhe Maqedonia është zbrazë prej shqiptarëve.

KALLXO.com: Nëse kthehemi në kohë, që nga dialogu në 2011-tën janë bërë gati 7 vite bisedime dhe në fund u prezantua ideja e Presidentit Thaçi. A mund të ndodhë në fakt një shkëmbim territoresh, si do të dukej një shkëmbim territoresh ndërmjet Kosovës dhe Serbisë?

Kim Mehmeti: Nuk jam gjithaq i dijshëm dhe gjithaq i informuar sa të pretendoj ta di, por ka diçka që shihet, dhe ajo që shihet është kjo që në një farë mënyre vërehet se atë që thash në fillim, që në Ballkan ka edhe marrëveshje të përkohshme, vetëm sa ta gënjejnë një popull për një kohë të caktuar, dhe unë kështu i shoh. Rrjedha e ngjarjeve tregon se të atilla janë, edhe marrëveshja për Bosnjën ka qenë e përkohshme derisa ta amortizohet një problem. Del puna që edhe Kosova s’paska qenë zgjidhje e përhershme, sepse tashti logjika më thotë, ju nëse i korrigjoni kufijtë atëherë nuk është ajo Kosovë që e kanë njohur 100 e sa shtete, domethënë është një Kosovë tjetër, çfarë të bëjmë ne me njohjet.

Pastaj një Kosovë e tillë, siç thotë Presidenti, me kufi të korrigjuar, atë që në të vërtetë shkojnë me kilometra territore, automatikisht shtrohet pyetja se cili është kuptimi sa të jetë shtet i pavarur, kur që e zgjidhë problemin me Serbinë, atëherë menjëherë ajo duhet të orientohet si ta zgjidhë problemin, në fakt të bashkohet me Shqipërinë. Që është shumë e natyrshme, që mbas asaj Serbia nuk të bën problem, se s’ka pse, në fund të fundit kjo loja e Serbisë ka të bëjë me Republikën Serbe në Bosnje dhe mbas kësaj shtrohet pyetja çfarë merret, se nëse për një autobus serb të Kosovës i ndërron kufijtë ç‘bëjnë ata serbë atje, nëse për një autobus serbësh ndërron kufijtë e Kosovës ç’bëmë ne 30 për qind e shqiptarëve të Maqedonisë.

Kështu që, kjo nuk është lojë aq e thjeshtë, kjo mund t’i duket ndonjë abdalli politik edhe lojë e thjeshtë, ajo edhe mund të shkojë për një kohë kështu, sepse unë nuk jam naiv, unë e di që kur të vendosin ashtu do të vijë ashtu, por çfarë do të bëjnë gjeneratat tjera, do të ulen dhe do të shikojnë lajmet sesi Kosova i ndërron kufijtë dhe shkëmben territore me Serbinë e si shqiptarët e Maqedonisë do të ulen e do të thonë, mirë që iu dha.

Jo, do të shtrohet një pyetje e logjikshme, pse tash të ekzistoj ajo Kosovë e tillë e cunguar, pse mos të bëhet pjesë e Shqipërisë, nëse ajo bëhet pjesë e Shqipërisë pse ne të mbetemi jashtë ne shqiptarët e Maqedonisë? Kështu që, naivi mendon ashtu siç mendon edhe i detyruari mendon ashtu siç mendon, unë e di që të detyrojnë serbët të pranosh ç’të të thonë. Dje ne si e çliruam Kosovën, ne morëm nëpër këngë me dy tela të çiftelisë të këndojmë çfarë të duam, mund t’u lëvdohemi edhe nipave se si kemi luftuar, mirëpo dihej sesi u çlirua, mos të kishte qenë NATO-ja, do të ishte rrëfimi krejtësisht ndryshe.

Në këtë kontekst, ne duhet të çlirohemi pak edhe nga varësia e të huajve në çdo gjë. Tjetër është mirënjohja, ne duhet t’u jemi mirënjohës Perëndimit, veçanërisht Shteteve të Bashkuara të Amerikës derisa të ekzistojë edhe shqiptari i fundit për atë që bën për shqiptarinë, por kjo mirënjohje nuk ta ndalon të jesh parimor ndaj vetvetes, kjo nuk ta ndalon, bile as nuk hidhërohen ata. Por, pse e bëmë ne këtë, ngaqë ne nuk e lexuam një lojë që na e bën burrështetasit tanë, ata i dëshmuan botës thua se ne jemi popull jo shtetformues.

Por, nëse është ashtu, atëherë ç’më duhen mua këta burrështetas nëse Ambasada Amerikane të më tregojë se çfarë duhet të bëj, ç’na duhet neve zgjedhjet për President, për Parlament nëse për çdo gjë duhet të huajt të dalin të na tregojnë se shqiptarët duhet të protestojnë, ose mos të protestojnë, rrini urtë, shkëmbeni territore, mos shkëmbeni territore. Ç’na duhen, për çfarë vendosim ne? Unë nuk jam naiv, nuk jam i mendësisë serbe se neve të huajt na kanë faj, jo, ne jemi fajtorë sepse na del që burrështetasit që i zgjedhim, kërkojmë më shumë baba sesa udhëheqës. Sepse ne nuk mund ta ndërrojmë, nëse njëherë bëhesh President dhe mbetet që edhe nipi të bëhet President, prandaj ne merremi edhe me të huajt, sepse ne nuk guxojmë të themi se çfarë bën të tanët, çfarë bën ata që mendojnë që duhet t’u takojë edhe lavdia si çlirimtarë që e kanë por edhe hajnia sot, dhe tash në emër të kësaj lavdie të dikurshme ne mos t’i quajmë hajna, në emër të asaj lavdie ne mos t’u themi që jeni budallenj politikë që s’merrni vesh kurrgjë, në emër të asaj lavdie t’i votojmë çdo herë, si mundet kjo, dhe kjo është pyetja që duhet ta shtrojmë dhe ka diçka që është më e keqe se kjo që bëjnë këta politikanë, ku janë elitat tona intelektuale, ku janë që të thonë se jo mirë, juve do t’u japim dekorata, do t’u ndërtojmë përmendore mirëpo mos na i ndërtoni të gjitha, mos na i ndërtoni edhe institucionet arsimore ju të atillë siç jeni të paarsimuar.

Do t’u japim edhe diploma doktor shkencash që i keni në qejf e që të ngriteni më lart, sepse ata mendojnë se është e turpshme të jesh hero i pashkolluar. Jo, është mburrje. Do t’u japim edhe diploma doktor shkencash, por mos bëhen edhe akademikë, mos bëhen rektorë, mos të bëhen profesorë, ata u bënë edhe profesorë. Kështu që, te shqiptaria shumëçka është ngatërruar, sepse te një popull që prishen standardet, te një popull që çdo kush mund të bëjë çdo gjë, nuk vlen asnjë parim. Në botë edhe për një rojtar pylli, kërkohet leje mjekësore, për të parë se a është në rregull, a i ka të gjitha dërrasat në vend. Te ne bëhesh President e askush nuk ta shtron këtë pyetje.

KALLXO.com: Ideja në fakt e Presidentit nuk është pritë mirë në Kosovë, tek spektri politik. Madje, Kryeministri  ka qëndrim kundërt, madje edhe ish- partia e Presidentit nuk e ka qëndrimin e qartë. Si duhet të sillet spektri politik në Kosovë karshi kësaj ide(korrigjimit të kufijve)?

Kim Mehmeti: Ne kemi politikanë pa asnjë parim, ne kemi politikanë që kanë vetëm një parim- kolltukun. Sepse ju e dini sesi ishte çështja edhe me kufirin me Malin e Zi, dhe e dini si ishte çështja me Gjykatën Speciale. Nuk donin, në fillim donin sepse na thonin të huajt, mandej kur morën vesh se edhe ata mund të dënoheshin donin ta prishnin edhe të huajt nuk ishin të rëndësishëm, domethënë, edhe të huajt për ata janë të rëndësishëm kur bëhet fjalë për fatin e tyre e jo për Kosovën e për shqiptarët. Për këtë ka dëshmi, Gjykata Speciale është dëshmia shkollariske, derisa ata mendonin se të tjerët do të dënoheshin, të gjithë u vërsulen le të ketë. Unë kam qenë kundër sepse ajo Gjykatë është e turpshme, ajo tregon se Kosova s’është shtet, Kosova s’ka gjykatat e veta, s’ka drejtësinë e vet. Mandej, kur e panë që mund të rrezikohen, thanë ta prishim dhe të huajt u ngritën të gjithë në këmbë, atë nuk e bënë se pati deputetë jo pse ata nuk deshën ata. Domethënë, nuk është e vërtetë që politika nuk ka moral, politika e ka një moral në vetvete, politika ka edhe njerëz parimorë, bile ata e mbajnë politikën mbi shpinën e vet, jo këta që parim të vetëm e kanë atë se si të mbeten unë në pushtet. Në rrethana te tilla ju keni kësi situate, ju kurrë s’mund ta dini se si do të veprojë nesër Presidenti i Kosovës, se nëse atij i del diçka tjetër nesër ma më shumë interes, ai e braktisë këtë si Gjykatën Speciale, ani të huajt le të reagojnë ai thotë që kjo nuk është në interes të Kosovës. Kështu është edhe me Kryeministrin, i mbani mend thëniet për kufirin me Malin e zi, u gjet një zgjidhje që do të korrigjohet një ditë. Ku është korrigjimi, edhe kjo tani mund të del që ta nënshkruajmë ne marrëveshjen por mandej do të bëjmë diçka, do ta kthejmë, ta lëmë të shkojë veriu nja 30 vjet në Serbi mandej do ta kthejmë. Domethënë, këso lojëra përdorën përpara një populli të lodhur nga gjitha anët. Nuk ka mëkat më të madh politik sesa ta keqpërdorësh varfërinë e popullit tënd, nuk ka mëkat më të madh politik, nuk ka kriminel më të mëdhenjtë politikë se sa ata që e keqpërdorin pashpresën e një rinie. Kryesisht burrështetasit e Kosovës e bëjnë këtë, e keqpërdorin dëshpërimin e një rinie.

Kosova është bërë varrezë masive e ëndrrave dhe shpresave rinore, dhe ajo rini thotë vetëm na i jepni pasaportat të dalim jashtë, kurrgjë më nuk u intereson. Kosova prej një djepi të atdhetarisë shqiptare u bë djep i dëshpërimit shqiptar, ku unë shkoj çdo ditë në Kosovë dhe të vetmen që dëgjoj është nga të rinjtë është se si të dalim nga Kosova. A ne, e kishim Kosovën që na ushqente me atdhetari, e këtë neve nuk na bënë as të huajt, as serbët, na bën elitat tona politike.

KALLXO.com: Kemi një situatë të re me vendosjen e taksës 100 për qind nga Qeveria Haradinaj, si e keni parë ju dhe si duhet të veprohet tutje me këtë taksë që po shihet pengesë edhe për vazhdimin e dialogut në mes Kosovës dhe Serbisë?

Kim Mehmeti: Është një masë jo racionale por shumë e mirë për të dëshmuar se edhe ne mundemi. Nga një vend që t’i ka bërë të gjitha ato fatkeqësi, edhe ajrin ilaçe me mu bë, siç ka thënë një e huaj, ajrin që e shet Serbia apo çka do, derisa të mos harrojë atë gjak që ka derdhur Serbia, unë nuk e dua atë ilaç. Edhe këtë ne mund t’ia tregojmë edhe botës, e ç’është më e rëndësishmja këtë e kanë thënë të huajt, nuk e ka thënë asnjë shqiptar, këtë që sapo thash më herët. Unë e di një gjë, ne duhet të bashkëpunojmë me të gjithë miqtë tanë, s’mund ne Beogradin ta mohojmë, mirëpo nuk mundësh ti kur ende ajo nanë atje vajton fëmijën e vet, ti menjëherë të bëhesh aq kosmopolit që të thuash kam harruar. Ti mund të thuash kam falë, mund të dalë ai të kërkojë falje dhe ti të thuash po, se ne e dimë që ka regjime se çfarë nuk bëjnë, mirëpo ti nuk mund të sillesh kinse ke harruar, është e turpshme ajo, me të vërtetë është turpshme. Kjo nuk ka të bëjë më me civilizim, nuk ka të bëjë më me kulturë, nuk ka të bëjë me ideologji, ajo ka të bëjë me brumin njerëzor. Ne shqiptarët e dimë atë se mund ta falim gjakun, por ti s’mund të harrosh, s’mund ta harrosh të vrarin tënd. Ti mund t’ia harrosh atij të gjitha që të ka bërë keq, por mos e harro të vrarin tënd.

KALLXO.com: Si mendoni se duhet të veprojë për taksën në këtë rast Qeveria Haradinaj. Ka pasur edhe reagime edhe nga ndërkombëtaret, ShBA dhe BE?

Kim Mehmeti: Sigurisht që ka reagime ndërkombëtare, mirëpo unë besoj, sepse unë jam njeri që nuk di të mendoj shumë politikisht se ju po bisedoni me një shkrimtar, mirëpo ju duhet të huajve këtë t’ua sqaroni, gjithë këto vite sa burrështetasit kosovarë që merren me Kosovën, ata nuk i shpjeguan botës se cila është e vërteta e Kosovës. Në ndërkohë, Serbia pothuajse e ktheu lojën në fillim, që problemi i Ballkanit janë shqiptarët. Në fund të fundit, ne shqiptarët e pranuam një pozitë që nuk është e tillë, ne doli që stabiliteti i Ballkanit janë shqiptarët, sepse edhe të huajt thonë, duhet të kontribuoni për stabilitetin në rajon. Po nuk varet stabiliteti në rajon nga ne, ç’mund të bëjmë ne nëse e ke një fqinj që të imponon gjithmonë dhunën, çfarë ne do të përkulemi? Domethënë, burrështetasit tanë e pranuan këtë edhe ndër të tjerat shkaku i asaj që ata pranuan dialogun ku, them ai që ka qenë fajtori të vë kushte, thotë do të bisedojë me ty nëse ma bën këtë, në vend që të jetë e kundërta, në vend që do të jetë Kosova që të thotë ne do të bisedojmë pasi të kërkohet falje, pasi të na kthejë edhe të vrarin e fundit nga atje sepse i dinë ata ku janë. Por, Kosova i lejoi Serbisë që edhe me të pagjeturit të bëj tregti, të të japë aq sa duhen, dhe ne arritëm dhe i ndihmuam deri aty saqë ajo të shpërblehet nga ndërkombëtarët për krimet e bëra, të shpërblehet që t’i ka kthyer 100 e sa të pa gjetur, të shpërblehet se të ka lejuar të dalësh në botë. Ndodhen gjëra absurde sepse ne, Kosova, pati burrështetas të cilët shtetin e konsideronin si pronë të veten edhe mandej të vetëdijshëm se nëse nuk zgjidhen disa probleme kjo sepse ata ushqehen me probleme. Mos të ishin ato probleme, populli do t’i pyeste se ku janë fabrikat, ku janë punësimet, ata me çfarë i gënjejnë popullin për kaq vite, do ta zgjidhim problemin me serbët, komunat nuk do të bëhen, nuk do të bëjmë Republikë Serbe në Kosovë, nuk do të bëjmë këtë nuk do bëjmë atë e u bënë të gjitha. Dhe, doli që të vetmen gjë, që si të inkuadrohet një pjesë e Kosovës në Serbi. Ky është absurd.

KALLXO.com: Qeveria e Kosovës ka formuar një delegacion për bisedime, siç e quajnë ata, shtetëror. Pjesë e tij vendosi të bëhet edhe partia e Shpend Ahmetit, i cili doli nga Vetëvendosje me 12 deputetë. Si e keni parë këtë veprim të Qeverisë, a përfaqëson ai delegacion unitetin e Kosovës në bisedime?

Kim Mehmeti: Ai (delegacioni) s’mundet edhe për shkakun e kësaj partisë që e përmendët ju, që ata janë hajdutë në njëfarë mënyrë, që e vodhën legjitimitetin që ua dha Vetëvendosje, sepse këtu te ne kurrgjë nuk konsiderohet vjedhje. Ajo është vjedhje klasike në politikë, që ju dilni me emblemën e Vetëvendosjes e merrni, bëhuni deputetë edhe pastaj thoni që jo tashti nuk më pëlqen me Albinin do të shkoj me Kaqushën. Vetë kjo tregon mendësinë politike mbi të cilat ndërtohet politika kosovare, dhe ju aty tash të prisni nga ky delegacion që të dalë diçka e hajrit. Është me të vërtetë sikur të prisni që të shkoni në shtëpi publike e të thoni, shiko këtu unë mendoj ta gjej gruan më të mirë për bashkëshorte, të virgjër, më shqiptare se këtu nuk nuk mund të ketë tjetër kund kjo ndodhë.

KALLXO.com: Kemi pasur një thirrje të fundit të Kryeministrit shqiptar, Edi Rama për bashkimin e Kosovës me Shqipërinë, gjithashtu ka qarkulluar ideja në opinion që pas shkëmbimit të mundshëm të territoreve në mes Kosovës dhe Serbisë të vihet te ideja e bashkimit në mes Kosovës dhe Shqipërisë. Sa mund të realizohet një skenarë i tillë?

Kim Mehmeti: Unë tash do të jem pak cinik. Kryeministri i Shqipërisë i bashkoi kriminelët e Shqipërisë, tash i mbetet t’i gjejë adresat e vërteta edhe nga kjo anë e kufirit sepse ata janë të bashkuar. Bota shqiptare sa i përket krimit dhe nëntokës politike ajo funksionon e bashkuar, ajo nuk është e ndarë, të ndarë jemi ne që nuk na lejohet të ecim lirshëm. Kur të na vini ju në Morinë kolonat janë 1 kilometër, ndërsa Kryeministri i Shqipërisë ka thënë se s’do të ketë kufi, dhe ne që s’dimë t’i fshijmë kufijtë mes shqiptarëve dhe shqiptarëve, ne dimë të ndërrojmë kufi me Serbinë. Sepse ne më lehtë merremi vesh me politikanet serbë se sa politikanët tanë mes vete. Shiheni a ka ndonjë elitë politike shqiptare që është e konfrontuar me ndonjë elitë të huaj të ndonjë populli tjetër siç janë në mes vete, po ku ka pasur këso armiqësie mes PS-së dhe PD-së në Shqipëri, kur ka pasur mes shqiptarëve dhe një pale tjetër të ndonjë populli tjetër.

Neve nuk na lejohet të bashkohemi, nuk na lejohet dhe prandaj stimulohet kjo egërsirë në mes nesh që mos të vijë rendi të pyesim se ku janë shqiptarët, por ne merremi me atë se cila parti do të vijë në pushtet. Kryeministri i Shqipërisë, unë nuk do të doja që ta bashkojë shqiptarinë ashtu siç e përçau. Ai nuk mund ta bashkojë Shqipërinë e tani do bashkojë shqiptarinë! Këtë se kuptoj, s’më duket e logjikshme. Ajo është sikur shtëpinë tënde ta bësh copa- copa e ke dalë mahallës t’i vësh rend. Ai në Shqipëri e bëri që çdo ditë të ketë protesta, tashti ai do ta bashkojë popullin, por unë nuk dua që ai të më bashkojë. Ai bashkim, do të thoja që është pak edhe pervers. Njeri që s’dinë ta bashkojë shtëpinë e vet, s’mund ai ta bashkojë fshatin. Mirëpo, pse hapen ato tema, shkaku i kësaj që ai të mbetet atje sa më gjatë në pushtet. Pse Presidenti i Kosovës insiston sa më shpejt të zgjidhet kufiri? Që ai ta vazhdojë jetëgjatësinë e tij politike, sepse pas asaj do t’i këndojnë këngë popullore, do t’i themi “na bashkove”, “na e stabilizove shtetin”, “na e bashkuat shqiptarinë” edhe kjo mund të ndodhë, që ky të ndërrojë territore e të nesërmen të bashkohemi, dhe e kemi një të mirë që harrojmë shpejt, do të fillojmë ta mitizojmë bashkimin e popullit, a në ndërkohë do të harrojmë qa na morën e çfarë s’na dhanë, e dhamë të tërën për të marrë atë që na takon. Këto janë këngët te ne, mbas një tragjedie një fitore, do ta harrosh atë tragjedi, kështu që edhe Kryeministri i Shqipërisë që të harrojnë shqiptarët sepse ai e bëri Shqipërinë një kopsht të drogës, një treg të drogës, edhe këtu që të harrojmë se çfarë ndodhi pas aq vitesh, mes Serbisë dhe Kosovës, mund të ndodhë një bashkim.

Duke harruar se trojet shqiptare, Shqipëria, Kosova dhe Maqedonia u bënë të pabanueshme për shqiptarinë edhe zbrazen çdo ditë. Zbrazën edhe kam frikë se do të vijë koha se në Maqedoni, në Shqipëri edhe në Kosovë do të jetojnë vetëm aq shqiptarë sa do të ketë votues për partitë politike në pushtet, vetëm ata. Edhe ekziston një koncept i tillë ndoshta pa vetëdije, që të arrihet qetësia të thonë se i kemi vetëm votuesit tanë, të tjerët le të shkojnë edhe jemi duke shkuar.

KALLXO.com: Këtu në Maqedoni është zyrtarizuar gjuha shqipe më institucione, po ashtu po flitet për një kandidat të mundshëm për President nga shqiptarët. Si është qeverisja e Zaevit ndoshta në krahasim me atë të kaluarën e Gruevskit?

Kim Mehmeti: Në kontekstin kualitativ, është mëkat të krahasosh Zaevin me atë sepse ka diçka që LSDM-në e dallon nga VRMO-ja. LSDM-ja e ka atë ndjesinë për shtetbërje, VRMO-ja thuajse nuk e ka, e ka vetëm ndjesinë si të bëjnë para. Mirëpo kur janë në pyetje shqiptarët thuajse se dallimi është shumë i vogël, vetëm se këta dinë se deri ku shkohet sepse këta e dinë që nuk ndërtohet Kishë në Kalanë e Shkupit, por ndërtohet në Strumnicë dhe ai e ndërton atje ku ti nuk e sheh para syve, mirëpo nuk ndërton edhe shkolla ta zëmë. Pse, sepse ata e kuptuan diçka që është e dhimbshme ta thuash, ende sundojnë sipas parimit se vetëm shqiptari i korruptuar dhe shqiptari i pandershëm është i mirë për shtetin për pushtetin, sepse është i dëgjueshëm, diçka që e kuptuan edhe ndërkombëtarët. Sa më i korruptuar politikani këtu në Ballkan aq më i dëgjueshëm është ndaj atyre, mirëpo ashtu nuk ndërtohet shtet.

Ju thatë zyrtarizmi i gjuhës shqipe. Nuk është zyrtarizuar gjuha shqipe sepse gjuha shqipe nuk zyrtarizohet me ligj, gjuha shqipe zyrtarizohet me Kushtetutë. Dhe në Kushtetutë gjuha shqipe nuk përmendet, as në ligj nuk përmendet, përmendet gjuha e 20 përqindëshit, a 20 për qind këtu nesër mund të vijnë kinezët të jetojnë apo sirianë dhe do të jetë gjuhë zyrtare. Këtu, përqindja është ajo që e përcakton përdorimin e gjuhëve zyrtare e jo autoktonia.