Foto: KALLXO.com
Veseli: Demarkacioni Duhet të Ratifikohet Deri të Mërkurën
Ani pse seanca e jashtëzakonshme për Demarkacionin u shty për nesër, kreu i Kuvendit Kadri Veseli ka thënë që ratifikimi i kësaj Marrëveshjeje duhet të përfundojë deri të mërkurën.
“Duam që deri të mërkurën çështja e ratifikimit të përfundojë”, tha ai.
Madje ai ka kërkuar për të dytën herë përkrahjen e mediave për këtë çështje.
“Kërkoj përkrahjen nga ju media, nga të gjithë qytetarët dhe çdo faktor që të arrijmë konsensusin”, theksoi Veseli.
Kur u pyet për votat e Listës Serbe, ai tha se duhet njëherë t’i kryejnë detyrat pozita dhe opozita.
“E vërteta është kjo, qytetarët e Kosovës duhet dhe do të lëvizin lirshëm në BE brenda këtij viti”, shtoi ai.
Ai tha se takimi me përfaqësuesit e partive politike, ku prezentë ishin edhe presidenti Hashim Thaçi dhe ambasadori Greg Delawie, ka qenë i mirë dhe drejt konsensusit.
“Jemi në rrugë shumë të mirë në përpjekje që të arrihet konsensusi i përbashkët, të jemi unik në seancën tonë të jashtëzakonshme për ratifikimit të Demarkacionit”, theksoi kreu i Kuvendit.
Në këtë takim nuk kanë qenë prezentë përfaqësues të Vetëvendosjes dhe Listës Serbe.
Të mërkurën në Kosovë pritet të vijnë përfaqësues të lartë të BE-së.