QKUK - Foto: KALLXO.com
Sulmohet Mjeku në QKUK
Një familjar i një pacienti e ka sulmuar fizikisht një doktor në Shërbimin Emergjent të QKUK-së.
Sipas Shërbimit Emergjent incidenti menjëherë është paraqitur në Polici, e cila në bashkëpunim me organet e tjera kompetente po merret me këtë rast.
“Për rastin në fjalë, drejtori i Shërbimi Emergjent ka njoftuar edhe drejtorin e përgjithshëm të Shërbimit Spitalor Klinik Universitar të Kosovës, duke shpjeguar se janë duke u grumbulluar të gjitha faktet për këtë rast” thuhet në komunikatë.
Sipas Shërbimit Emergjent ky nuk është rasti i parë i sulmit ndaj mantelbardhëve të Qendrës Emergjente.
“Stafi i Shërbimit Emergjent kërkon nga gjithë familjarët e pacientëve të mos pengojnë punën e tyre, por të lejojnë që punën ta kryejnë pa presione ngase profesionistit shëndetësor është mjaftë e ndjeshme dhe kërkon intervenim të shpejtë”, thuhet në një komunikatë të Shërbimit Emergjent.
Ky institucion shëndetësor shpreson se organet e rendit dhe ato të drejtësisë do të kryejnë punën e tyre dhe stafi të ketë siguri gjatë kryerjes së shërbimeve mjekësore.
Shërbimi Emergjent nuk tregon motivet e sulmit as nëse mjeku i sulmuar ka pësuar lëndime.
KALLXO.com kishte raportuar edhe për një rast tjetër kur pacientët kishin sulmuar mjekët.
http://kallxo.com/pacarada-edhe-mjeket-pesojne-nga-pacientet/