Sulmohet me Granatë Objekti Qeveritar në Mitrovicë të Veriut
Lajmin e konfirmoi për KALLXO.com, zëvendës komandanti rajonal i policisë për veriun e Kosovës, Besim Hoti.
“Nga hedhja e një granate dore në veri të Mitrovicës janë dëmtuar xhamat e objektit qeveritar të Kosovës”, tha Hoti.
Objekti i sulmuar ishte përuruar dy javë më parë, më 28 dhjetor 2016, nga ministrja për dialog, Edita Tahiri.
Në ditën e përurimit, Tahiri kishte thënë se Kosova “po e shtrin sovranitetin e vet në pjesën veriore të vendit”.
Në këtë objekt është paraparë t’i kenë zyrat 15 ministri dhe agjenci qendrore që kanë fushë veprimtari lokale si Ministria e Administratës Publike, Ministria e Administrimit të Pushtetit Lokal, Ministria e Kulturës Rinisë dhe Sportit, Ministria e Tregtisë dhe Industrisë, Ministria e Zhvillimit Ekonomik, Ministria e Bujqësisë, Pylltarisë dhe Zhvillimit Rural, Ministria për Kthim dhe Komunitete, Ministria e Mjedisit dhe Planifikimit Hapësinor, Administrata Tatimore e Kosovës, Agjencia e Statistikave, Agjencia e Veterinës dhe Ushqimit, Agjencia për Mbrojtjen e Pyjeve, Agjencia Kadastrave, Agjencia e Arkivave, Agjencia e Shoqërisë së Informacionit dhe Agjencia për Mbrojtjen e Mjedisit të Kosovës. Gjithsejt do të punojnë 105 zyrtarë të punësuar në këto institucione.
