Arrestohen dy persona për plagosje në Gjakovë

Më 10.03.2024 tre persona kishin marrë plagë nga arma e zjarrit në rrugën “Fan Stilian Noli” në Gjakovë.

Ngjarja e cila ishte regjistruar në mesnatë nisi të hetohej ndërsa policia ka njoftuar se ka arrestuar tashmë dy persona të dyshuar për këtë ngjarje.

Sipas njoftimit të policisë, më 03.05.2024 janë arrestuar dy të dyshuarit dhe njërit nga ta i është konfiskuar një pistoletë me 12 copë fishekë.

E njëjta armë dyshohet sipas policisë së ishte përdorur në rastin e plagosjes.

I dyshuari i dytë sipas policisë është arrestuar nën dyshimin e bazuar për dhënie të ndihmës në kryerjen e veprës penale.

Të dy janë dërguar fillimisht për intervistim e më pas është njoftuar edhe prokurori i cili ka urdhëruar që të dyshuarit të dërgohen në mbajtje.

Në mars të këtij viti, ishte raportuar për të shtëna armësh në Gjakovë. Pas një mosmarrëveshje një person dyshohej se kishte plagosur me armë zjarri tre burra.

Të plagosurit ishin dërguar në Spitalin e Gjakovës për tretman mjekësor ndërsa në atë kohë i dyshuari ishte arratisur.