SMS-të e Rastit Limaj
Ish-kryetari i Gjilanit Qemajl Mustafa për të katërtën herë u gjend në karrigen e dëshmitarit në rastin e njohur si MTPT, ku të akuzuar janë Fatmir Limaj, Endrit Shala, Nexhat Krasniqi, Florim Zuka e Shpëtim Telaku.
Prokurori i këtij rasti-amerikani Charles Hardaway shfrytëzoi të drejtën e tij ligjore për të rimarrë në pyetje dëshmitarin Mustafa.
Hardaway, u fokusua në SMS-të të cilët ishin këmbyer në mes të të ndjerit Mehmet Shkodra dhe ish-kryetarit të Gjilanit.
Prokurori Hardaway i tregoi dëshmitarit Mustafa një SMS ku thuhej ”çfarë të bëj miku im, as mua nuk po më dëgjon askush, i kam treguar atij të kujdeset për ty,” dhe e pyeti nëse i kujtohej të kishte dërguar këtë sms tek i ndjeri Shkodra, ndërsa kjo u konfirmua nga Mustafa.
Prokurori Hardaway vazhdoi marrjen në pyetje të Mustafës duke i treguar përsëri një SMS të 18 korrikut 2009.
“Kryetar nëse dikush ofron çmim më të ulët, atëherë Hatixhja duhet të bëjë disa akrobacione,” thuhej në sms-në e dërguar nga Shkodra te Mustafa.
Mustafa e pohoi se i kujtohej edhe ky SMS.
Hardaway i tregoi pastaj dëshmitarit SMS-në e radhës që Mustafa ia kishte dërguar Shkodrës. Në të thuhej “Do e shohim shok, mund të konkurrosh, ne të tjerët nuk jemi të rëndësishëm”.
Mustafa nuk e mohoi as këtë SMS.
Prokurori Hardaway vazhdoi marrjen në pyetje të dëshmitarit Mustafa duke e pyetur për njohuritë e tij lidhur me tenderët e rrugëve dhe pajisjet që nevojiten për këta tenderë.
“Unë kam njohuri të përgjithshme, por nuk mund të them se i njoh me emër pajisjet që nevojiten për këtë punë,” u përgjigj ish-kreu i Gjilanit.
Pasi pranoi këtë përgjigje, prokurori Hardaway e pyeti Mustafën se si atëherë kishte thënë se Mehmet Shkodra ishte i pakualifikuar për të fituar tenderët për mirëmbajtjen e rrugëve në Komunën e Gjilanit?
“Unë nuk i njoh me detaje makineritë, por i di pajisjet që duhen për punë në rrugë. Në një letër ai thoshte edhe vetë se nuk kishte përgatitjen e duhur, nuk kishte referenca,” u përgjigj Mustafa.
Mustafa edhe njëherë përsëriti se i ndjeri Shkodra ishte i specializuar për prerjen e drunjve, hoteleri dhe naftë.
Prokurori Hardaway, marrjen në pyetje të Mustafës e përmbylli me pyetjen nëse dëshmitarit i kujtohej që Mehmet Shkodra i ishte ankuar atij për Fatmir Limajn që nuk ia kishte dhënë mirëmbajtjen verore të rrugëve, por kjo u mohua nga dëshmitari Mustafa.
Mustafa në procesin që lidhet me ministrin dhe zyrtarët e ish-Ministrisë së Transportit dhe Telekomunikacionit dëshmoi edhe në muajin mars.
Edhe atëherë foli për SMS-të e shkëmbyer me Shkodrën dhe tenderët që janë pjesë e gjykimit.
http://kallxo.com/qemajl-mustafa-ne-gjykimin-e-limajt/
http://kallxo.com/qemajl-mustafa-perseri-ne-gjykimin-e-limajt/
Në këtë proces gjyqësor Fatmir Limaj akuzohet për shpërdorim detyre dhe krim të organizuar lidhur me tenderët për mirëmbajtjen e rrugëve në Komunën e Gjilanit. Për të njëjtat vepra ngarkohen edhe Nexhat Krasniqi e Endrit Shala. Pjesë e gjykimit janë edhe Shpëtim Telaku e Florim Zuka.
Limaj këtë aktakuzë që nga EULEX-i quhet e konsoliduar pasi në të janë bashkuar rastet MTPT1 dhe 2 më 30 tetor të vitit të kaluar e cilësoi të ngritur me urdhër politik.
