I sanksionuari i SHBA-së, Nexhat Krasniqi
Nexhat Krasniqi mohon akuzat se ka qenë i përfshirë në korrupsion
Nexhat Krasniqi, i cili pas sanksioneve nga Shtetet e Bashkuara të Amerikës (SHBA), është pezulluar nga detyra e udhëheqësit të Divizionit të Prokurimit në Ministrinë e Mjedisit, Planifikimit Hapësinor dhe Infrastrukturës (MMPHI), ka reaguar pas kritikave të shumta kur u emërua përkohësisht si drejtor i Departamentit të Infrastrukturës Rrugore në të njëjtën ministri.
Krasniqi thotë se në Kosovë nuk është dënuar asnjëherë për korrupsion apo marrje të ryshfetit.
“Në Republikën e Kosovës, ku jetoj e punoj prej kur kam lind, KURR në jetë nuk jam dënuar për korrupsion e as për marrje ryshfeti…. Jam hetuar, jam vëzhgua e jam akuzua nga prokuror amerikan, nga prokuror ndërkombëtar të EULEX-it, nga prokuror shqiptar të të gjitha prokurorive… Jam gjykuar e ri-gjykuar nga gjykatës amerikan, nga gjykatës ndërkombëtar të Eulexit, nga gjykatës shqiptarë të të gjitha gjykatave. KURRË KURRË KURRË asnjëherë nuk jam dënuar as për korrupsion e as për marrje të ryshfetit”- ka shkruar Krasniqi.
Në reagimin e tij në Facebook, Krasniqi ka publikuar një dokument që sipas tij është aktgjykimi i Gjykatës së Apelit të EULEX, ku thuhet se Krasniqi nuk është shpallur fajtor.
“Sa i përket rastit te vitit 2005 për të cilin po thuhet se paskam keqpërdorur pozitën time publike duke pranuar ryshfet në këmbim të dhënies së kontratës për lejimin e Ndërtimit të Parkut Industrial në Komunën e Drenasit nga kompania operuese Eltoni, që të kuptohet saktë nga të gjithë po e publikoi Aktgjykimin e Gjykatës së Apelit të EULEX për këtë rast”- është shprehur ai.
“Kurrë mos u ndalni duke folur e duke shkruar zi e terr për mua, natyrisht pa asnjë fakt, veç mundohuni të paktën nganjëherë ta bëni punën e gazetarit me etikë e profesionalizëm”- ka shtuar Krasniqi.
Nexhat Krasniqi, tashmë ish-shef i Prokurimit në Ministrinë e Infrastrukturës, më 3 nëntor ka hyrë në listën e sanksioneve të Departamentit Amerikan të Shtetit, duke iu ndaluar hyrja atij dhe dy fëmijëve të tij.
DASH në vendim e ka caktuar si “të papërshtatshëm për hyrje në Shtetet e Bashkuara, për shkak të përfshirjes së tij në korrupsion të madh”.
“Shtetet e Bashkuara e sanksionojnë Nexhat Krasniqin, ish-drejtorin e Prokurimit në Ministrinë e Tregtisë dhe Industrisë së Kosovës, si përgjithësisht të papërshtatshëm për hyrje në Shtetet e Bashkuara, për shkak të përfshirjes së tij në korrupsion të madh. Si zyrtar publik përgjegjës për mbikëqyrjen e kontratave të prokurimit, Krasniqi ka keqpërdorur pozitën e tij publike duke pranuar ryshfet në këmbim të dhënies së kontratës për lejimin e ndërtimit të parkut industrial në komunën e Drenasit nga kompania operuese Eltoni” – thuhet në vendimin e DASH-it.
Sipas Departamentit amerikan të Shtetit, ky veprim nga SHBA dëshmon se Uashingtoni qëndron me ata në Kosovë që kërkojnë përgjegjësi nga zyrtarët e korruptuar publikë.
“Veprimi i sotëm tregon se Shtetet e Bashkuara qëndrojnë me ata në Kosovë që kërkojnë llogari nga zyrtarët publikë të korruptuar. Ky emërtim ripohon përkushtimin e SHBA-së për të luftuar korrupsionin, i cili dëmton interesin publik, pengon prosperitetin ekonomik të vendeve dhe pakëson aftësinë e qeverive për t’iu përgjigjur në mënyrë efektive nevojave të njerëzve të tyre” – thuhej në vendimin e SHBA-s.
Shefi i Prokurimit në Ministrinë e drejtuar nga Liburn Aliu dhe zëvendësi i tij, Hysen Durmishi, me vendim të Departamentit amerikane të Shtetit është sanksionuar si i “papërshtatshëm për hyrje në Shtetet e Bashkuara, për shkak të përfshirjes së tij në korrupsion të madh”,, ndërlidhur me rastin e Parkut Industrial në Drenas.
Në njoftimin për kontratë që ishte publikuar nga Ministria e Infrastrukturës më 1 nëntor, Nexhat Krasniqi figuronte si pikë kontakti për këtë tender.
Vite më parë, Krasniqi ishte dënuar për keqpërdorim të detyrës brenda Ministrisë, por më vonë me vendim të Këshillit të Pavarur Mbikëqyrës për Shërbimin Civil (KPMSHCK), ishte kthyer në detyrë.
Ai ishte i përfshirë edhe në një rrahje në MMPHI në vitin 2022.
