Qeveria Synon Rritje të Punësimit Përmes Teknologjisë Informative

Promovimi dhe zhvillimi i sektorit të teknologjisë informative në përgjithësi, zhvillimi i eksporteve të shërbimeve të saja në veçanti, si dhe mundësia për zhvillim të qëndrueshëm ekonomik të vendit do të jetë qëllimi kryesor i kësaj strategjie.

Kështu u tha në lansimin e “Strategjisë Kombëtare të Teknologjisë Informative”, organizuar nga Ministria e Zhvillimit Ekonomik, në bashkëpunim me Shoqatën për Teknologji të Informacionit dhe Komunikimit të Kosovës (STIKK).

Në hyrje të konferencës, ministri i Zhvillimit Ekonomik, Blerand Stavileci, tha se kjo strategji do të bëjë konsolidimin e sektorit të teknologjisë informative, zhvillimin e tregut dhe nxitje të risive.

“Kjo strategji i hap rrugë jo vetëm zhvillimit të komunikimeve elektronike, mirëpo edhe besoj se i vë bazat e forta dhe solide për një ekonomi të bazuar në dije, për një ekonomi e cila hapëron drejtë asaj që është trend botëror, pra ekonomisë digjitale”, tha ministri Stavileci.

Ndërsa, kryeministri i vendit, Isa Mustafa, tha se ekonomia digjitale ka përfshirë një rrjet të gjerë të veprimtarive dhe se potencialet e kësaj ende nuk janë shfrytëzuar aq sa duhet, por sipas tij këto potenciale mund të kontribuojnë në rritjen ekonomike.

“Jemi të vetëdijshëm se sot ekonomia digjitale ka përfshirë një rrjet të gjerë të veprimtarive ekonomike. Përfundimisht potencialet e ekonomisë digjitale akoma nuk janë shfrytëzuar në Kosovë aq sa duhet, ashtu siç nuk janë shfrytëzuar edhe ne vendet e tjera të BE-së, por këto potenciale mund të kontribuojnë pa masë në rritjen ekonomike sidomos në fushën e punësimit”, tha Mustafa.

Jan Braathu, ambasadori i Norvegjisë në Kosovë, tha se qeveria norvegjeze do ta mbështesë Kosovën në harmonizimin e arsimit me sektorin e teknologjisë informative.

Zhvillimi i Strategjisë së TI-së për Kosovën është mbështetur nga Agjencia Gjermane për Bashkëpunim Ndërkombëtar (GIZ) dhe Ministria Norvegjeze për Punë të Jashtme.