Paraburgim të Dyshuarit për Falsifikim
Paraburgimin Zenelit sot pasdite ia caktoi Gjykata Themelore në Gjilan.
Prokurorja e shtetit Rozalinda Hasani paraqiti sot para gjyqtarit të procedurës paraprake Ramiz Azizi kërkesën për caktimin e masës së paraburgimit ndaj të dyshuarit Agim Zeneli.
Sipas prokurores, Zeneli dyshohet se ka kryer veprën penale falsifikim i dokumenteve.
Hasani e arsyetoi kërkesën për paraburgim me arsyetimin e ekzistimit të dyshimit të bazuar se i pandehuri ka kryer veprën penale, ndërsa tha se me provat të cilat paraqiti është plotësuar kushti ligjor për caktimin e paraburgimit.
Të kundërtën e prokurores e tha Fahri Nuhiu, avokati i Agim Zenelit që deklaroi se klienti i tij nuk duhet të qëndrojë në burg.
Sipas avokatit, provat të cilat i ka paraqitur prokuroria nuk janë argument i mjaftueshëm që të caktohet masa e paraburgimit, pasi që ato prova tashmë janë të sekuestruara nga policia, prokuroria dhe gjykata dhe nuk ekziston dyshimi se i mbrojturi i tij t’i dëmtojë apo zhduk këto prova.
Nuhiu i propozoi gjykatës që Agim Zenelit t’ia caktojë masën e arrestit shtëpiak, apo lajmërimit në stacionin policor.
Sipas prokurorisë Agim Zeneli dyshohet se ka falsifikuar nje aktgjykim të Gjykatës Themelore të Gjilanit, procesverbalin e kontrollimit të veturës, kërkesë- ftesën për tërheqjen e gjërave të konfiskuara, certifikatën e notave te UP-së dhe dy aktvendime të gjykatës.
Gjykata Themelore në Gjilan pasdite ka sjellur aktvendimin me të cilin ka aprovuar kërkesën e Prokurorisë Themelore në Gjilan, për caktimin e masës së paraburgimit në kohëzgjatje prej 1 muaji për të pandehurin Agim Zeneli.