‘Jeta në Kosovë’ për Dënimet e Buta në Drejtësinë Kosovare
Emisioni “Jeta në Kosovë” sonte do të merret me raportin e BIRN-it dhe Internews Kosova për monitorimin e sistemit të drejtësisë në Kosovë për vitin 2015.
Drejtues të sistemit të drejtësisë në vend, gjykatës, prokurorë dhe përfaqësues të Bashkimit Evropian do të flasin për raportin i cili evidenton të metat e gjykatave dhe prokurorive në tërë Kosovën.
Raporti është hartuar në monitorimin e mbi 500 seancave gjyqësore gjatë vitit të kaluar nga monitoruesit e BIRN-it dhe Internews Kosova dhe fokusohet në dënimet e buta që gjykatësit kanë dhënë në rastet që kanë të bëjnë me korrupsionin dhe vjetrimin e lëndëve që janë në proces hetimi, ndaj të cilave hetimet përfundojnë pa dhënë rezultate.
Në debatin e zhvilluar do të flitet edhe për qasjen e prokurorëve dhe gjykatësve ndaj rasteve të terrorizmit.
Një pjesë e debatit është zhvilluar edhe për defektet që e kanë përcjellë Pallatin e Drejtësisë që nga ditët e para të lëshimit të tij në funksion, në mars të vitit të kaluar.
Emisioni ‘jeta në Kosovë’ transmetohet sonte në RTK në orën 20:20 ndërsa repriza të hënën në mesditë.