Haradinaj kujton viktimat e masakrës së Qyshkut

Kryeministri I Kosovës Ramush Haradinaj, ka bërë homazhe te lapidari i të rënëve në Qyshk, në shënimin e përvjetorit të masakrës së 100 civilëve në fshatrat Qyshk, Zahaq, Llabjan e Pavlan.

Ai tha se masakra e Qyshkut është njëra prej ngjarjeve dhe dhimbjeve më të mëdha të kohës së luftës, sepse ishte masakër ndaj civilëve të pafajshëm e të pambrojtur.

“E vërteta është që kemi plot vende ku pushojnë qindra qytetarë të pafajshëm, të pambrojtur, pra të asaj kohe, të paarmatosur”, tha kryeministri Haradinaj, pas homazheve te lapidari i të rënëve në Qyshk.

Me këtë rast, kryeministri Haradinaj tha se masakra e Qyshkut, dëshmon për rrugën e vështirë deri në liri, njëkohësisht për dhimbjen e madhe.

“Por është edhe një porosi për drejtësinë si vendore, si ndërkombëtare që të vendoset drejtësia, pra të dënohen kryesit e këtyre krimeve ndër më të mëdha që kanë ndodhur pas Luftës së Dytë Botërore në Evropë”, u shpreh ai.

Kryeministri Haradinaj ka bërë homazhe edhe në fshatin Pavlan, Zahaq e Llabjan të Komunës së Pejës.

Në fshatrat Qyshk, Zahaq, Llabjan e Pavlan nga forcat serbe janë vrarë dhe masakruar rreth 100 civilë, në mesin e të cilëve kishte edhe banorë të zhvendosur nga fshatrat Vranoc, Raushiq, Batushë, Graboc e Zllapek, që strehoheshin në këto fshatra.