Vrasja e dy vëllezërve, dëshmitari: I pash të akuzuarit duke e vrarë Burimin

Në gjykimin për vrasjen e dy vëllezërve në Shaptej të Deçanit, për çka po gjykohen babë e bir, Sali e Durim Lushaj, dëshmitari Ramë Ramaj ka rrëfyer se çfarë ka parë në momentet tragjike të 25 gushtit 2016.

Ai tha se Durim e Sali Lushaj e kishin vrarë Burim Ramajn, duke folur për njërin prej dy vëllezërve të vrarë.

“Durimi e Salihu janë kanë tuj e vra Burimin. Tjetërkënd s’e kam pa”, deklaroi dëshmitari.

Por, mbrojtësi i të akuzuarit Durim Lushaj, avokati Sali Mekaj, tha se një fakt të tillë dëshmitari nuk e kishte thënë në shqyrtimet e mëhershme.

“Rexhepi ka qenë i shtrire përtokë, i ramë përmbys dhe të akuzuarit kanë qenë afër, kapur me Burimin”, e ballafaqoi avokati Mekaj dëshmitarin me deklaratën e tij.

“Çka nënkupton me fjalën kapur?”, pyeti avokati.

“Unë kapur nuk kam thënë, s’di pse është konstatuar ashtu”, u përgjigj dëshmitari.

Reagime pati edhe vetë i akuzuari Durim Lushaj. Sipas tij dëshmitari Ramë Ramaj as nuk kishte qenë në vendngjarje.

Mbrojtësja e të akuzuarit Salih Lushaj, avokatja Kosovare Kelmendi pati vërejtje lidhur me dëshminë e dëshmitarit Ramë Ramaj, sidomos të pjesa kur dëshmitari thotë se “të akuzuarit e kanë shtënë me armë në shpinë të të ndjerit Burim”, e që sipas avokates ky i fundit nuk kishte asnjë plagë në shpinë.

Në fillim, mbrojtësit e të akuzuarve e kundërshtuan dëgjimin e dëshmitarit, me arsyetimin se Ramaj në gjykimin e kaluar kishte qëndruar në sallë të gjykimit derisa janë dëgjuar dëshmitarët e tjerë.

Por, kryetarja e trupi gjykues Violeta Husaj Rugova, e konsideroi të pabazuar propozimin e mbrojtësve, me arsyetimin se pas ndërrimit të trupit gjykues, dëshmitari Ramë Ramaj nuk është dëgjuar asnjëherë si dëshmitar.

“Gjersa se a është dëshmitari kredibil apo  jo, i takon gjykatës ta vërtetojë”, shtoi gjykatësja Husaj Rugova.

Seanca e radhës mbahet me 26 dhjetor 2019.

Sipas prokurorisë, Sali e Durim Lushaj, që janë babë e bir, akuzohen për vrasjen e vëllezërve Rexhep e Burim Ramaj në fshatin Shaptej të Deçanit.

Sipas aktakuzës së Prokurorisë së Pejës, Durim Lushaj akuzohet për vrasjen e Rexhep Ramajt me armë zjarri.

I njëjti, sipas aktakuzës, pasi kishte privuar nga jeta Rexhep Ramaj bashkë me Sali Lushajn akuzohet edhe për vrasjen e Burim Ramajt me armë zjarri.