Gjykatësi kërkon që monitoruesit ta shlyejnë incizimin e CD-së të lëshuar në gjykimin për trafikim me armë

Gjykatësi Valon Kurtaj ka kërkuar sot nga monitoruesit që ta fshijnë incizimin e CD-së së lëshuar në seancën publike.

CD-ja me xhirime nga vendi i ngjarjes së datës 27 qershor 2017 te restoranti “Nora” në të cilën shihen të akuzuarit duke bartur armët e mbështjella është lëshuar sot në gjykatore në seancën publike.

Mirëpo anëtari i trupit gjykues Valon Kurtaj ka kërkuar nga monitoruesit e KALLXO.com që këto incizime të fshihen në të kundërtën paralajmëroi se do të thirren zyrtarët e sigurimit.

Kjo CD është lëshuar me kërkesën e avokatit Sali Mekaj, mbrojtës i të akuzuarit Miftar Dobraj.

Poashtu gjykata nuk mori vendim për t’ua ndaluar apo kufizuar monitorueseve fotografimi dhe filmimin e seancës ashtu siç parashihet me Kodin e Procedurës Penale.

Sipas prokurorisë speciale,  Miftar Drobraj, Artan Kelmendi dhe Daniel Prendrecaj po akuzohen se duke vepruar si një grup i organizuar në krye me ish-vozitësin e Konsullatës së Kosovës në Nju Jork, Albert Veliu, kanë kryer veprën penale të trafikimit me armë.

Në muajin prill të vitit 2018, filloi gjykimi ndaj të akuzuarve nën akuzën për krim të organizuar për trafikimin e armëve.

Në seancën e parë të 17 prillit 2019, Dren Mulla kishte pranuar fajësinë për veprën penal armëmbajtje pa leje edhe procesi gjyqësor ndaj tij ishte veçuar duke vazhduar me tre të akuzuarit e tjerë.

Gjykata e shkallës së parë me 20 korrik të vitit 2018 kishte shpallur fajtor të akuzuarit për veprat penale trafikim me armë dhe armëmbajtje pa leje.

Gjykata e Prishtinës e kishte dënuar grupin e organizuar me 12 vjet e 8 muaj burgim e 14 mijë euro gjobë, ndërsa individualisht u kishte shqiptuar këto dënime.

Gjykata e Prishtinës kishte dënuar Miftar Dobrajn me 5.6 vjet burgim dhe 7 mijë euro gjobë.

Artan Kelmendi u dënua me 5.2 vjet burgim dhe 5 mijë euro gjobë, ndërsa Daniell Prenrecaj me 2 vjet burgim dhe 3 mijë euro gjobë, e i akuzuari Dren Mulla u dënua me 4 mijë euro gjobë.

Poashtu Gjykata kishte dhënë dënim plotësues konfiskimin e antitankës ‘’zollë’’ me projektil 64 mm,  8 pushkëve automatike  AK47, një pushke ajrore, një revole “Glock”, një Audi A3, shumën prej 1,653 euro si dhe 3 telefona.

Por Gjykata e Apelit e kishte kthyer çështjen në rigjykim për shkak të shkeljeve esenciale të dispozitave procedurale, pasi që gjykata e shkallës së parë në hyrje të aktgjykimit ka përshkruar kualifikimin ligjor që  e ka bërë gjykata e jo Prokuroria, pastaj dispozitivi I aktgjykimit është në kundërshtim me arsyetimin e tij, konstatimi i gjykatës ë shkallës së parë ishte në kundërshtim me provat materiale, gjykata e shkallës së parë nuk e ka aprovuar cilësimin juridik të aktakuzës.

Ndërsa për të akuzuarin Dren Mulla është vërtetuar aktgjykimi i shkallës së parë.

Kallxo.com ka raportuar ne vazhdimësi lidhur me këtë rast.