Vdekja e punëtorit pasi u lëndua në vendin e punës, arrestohen gjashtë persona të dy kompanive
Policia në Prizren ka arrestuar 6 të dyshuar- menaxherë të dy kompanive lidhur me rastin ku një 18-vjeçar në Prizren, humbi jetën pas lëndimeve në vendin e tij të punës.
Lajmin për KALLXO.com e ka konfirmuar zëdhënësi në Policinë e Prizrenit, Shaqir Bytyqi.
Bytyqi ka thënë se janë arrestuar 6 persona të dyshuar të cilët kanë qenë përgjegjës për sigurimin e punimeve dhe vendit të punës.
Ai ka deklaruar se gjashtë të dyshuarit, me urdhër të Prokurorit të Shtetit janë dërguar në mbajtje për 48 orë.
“Me datë 5 tetor Policia ka arrestuar 6 menaxherë të dy kompanive të cilët janë përgjegjës të vendpunimev ku janë intervistuar për incidentin që ka ndodhë. Ata kanë qenë përgjegjës për punimet dhe sigurimin e vendit të punës”- ka deklaruar Bytyqi.
Sipas Policisë dy persona burra, deri sa ishin duke punuar njëri nga ta ka pësuar lëndime të rënda trupore.
Për shkak të natyrës së lëndimeve punëtori u dërgua në Qendrën Klinike Universitare për tretman mjekësor. Si pasojë e lëndimeve i njëjti kishte vdekur në QKUK.