Shtyhet seanca gjyqësore ndaj Azem Sylës dhe të tjerëve
Ish-deputeti i PDK-së Azem Syla së bashku me 17 të bashkakuzuar të tjerë u paraqiten sot në gjykatoren e Prishtinës, për t’u përballur me akuzat që prokuroria iu vë në barrë.
Ndaj tyre rëndojnë akuzat për krim të organizuar në tjetërsim të tokave me pronësi shoqërore në Veternik e Llapnasellë, në afërsi të Prishtinës.
Seanca e paraparë të mbahej sot, u shtye për shkak se prokurori special i rastit, Naim Abazi nuk ishte i pranishëm, si shkak – rast vdekje ndërsa prokurorja Sebahate Hoti që kishte ardhur për zëvëndësim u deklarua që nuk mund të vazhdojë marrjen në pyetje të dëshmitarëve sepse nuk e njeh thelbësisht me rastin.
Trupi gjykues në këtë çështje përbëhet nga Arben Hoti, kryetar dhe Mentor Bajraktari dhe Lutfi Shala – anëtarë.
Tutje, kryetari i trupit gjykues në këtë çështje, Arben Hoti tha se vendimet për masat e paraburgimit për të akuzuarit, do të merren jashtë seancave gjyqësore.
Seancat e radhës lidhur më këtë çështje pritet të mbahen në shkurt 2024.
Të pandehurit akuzohen për veprat penale krim i organizuar, pastrim i parave, marrje e mitos, mashtrim i rëndë, mashtrim në detyrë, nxjerrje e vendimeve gjyqësore të kundërligjshme, keqpërdorim i pozitës zyrtare, legalizimi i përmbajtjes së falsifikuar dhe evazion fiskal.
Aktakuza e parë, e parashtruar nga një prokuror ndërkombëtar i PSRK-së, është ngritur kundër 22 të pandehurve dhe përbëhet prej 46 pikave.
Aktakuza e dytë e ngritur nga i njëjti prokuror akuzon 17 persona për pastrim të parave, mirëpo kjo aktakuzë ka pushuar për shumicën e të akuzuarve kurse për Ilaz Syla dhe Vidosav Novakoviq, gjyqtari ka vendosur ta bashkojë procedurën me të akuzuarit tjerë meqë është i njëjti rast.
Anëtarët e këtij grupi të organizuar, akuzohen se kanë bashkëpunuar mes vete, secili me rol të caktuar, për t’i privuar Kosovës pronat shoqërore përmes veprimtarive kriminale, duke përfshirë falsifikimin e vendimeve dhe dokumenteve të tjera zyrtare, mashtrimin dhe veprimeve korruptive.
Raportimet lidhur me rastin Toka i gjeni në këtë link.