Ordinanca private në Viti, Foto: Dukagjini
Policia heton vdekjen e 52-vjeçares, mjeku: Erdhi pa shenja jete
Një grua 52-vjeçare ka arritur e vdekur në një ordinance private në Viti. E ndjera ishte trajtuar disa herë në këtë klinikë e cila ishte më e afërta nga fshati Vërbovc, aty ku edhe banonte. E njëjta është marrë nga Emergjenca por nga kjo e fundit nuk janë deklaruar për media.
Pas shqetësimeve shëndetësore që kishte pasur, një grua që i përkiste komunitetit rom ka arritur e vdekur në Ordinancën “Medikus” në Viti, të shtunën.
Kjo qendër mjekësore është më e afërta me fshatin Vërbovc, i cili njëherit është fshati ku e ndjera banonte.
Doktori që është edhe pronari i kësaj ordinance, Rrahim Avdiu për Televizionin Dukagjini ka thënë se 52-vjecarja kishte shkuar pa shenja jete në ordinancën e tij.
“Pacientja, kur jam afru te ajo, pacientja ka qenë pa shenje jete. Megjithëse familjarët kërkonin ta ngjallja por unë nuk mund ta ngjall njeriun e vdekur edhe i kam dhënë adrenalinë. Ka vuajtur prej diabetit, hernisë abdominale, bronhit kronik, shtypjes e yndyrës. Shumicën e terapisë e ka marrë nga spitalet serbe”, ka deklaruar Rrahim Avdiu.
E ndjera ishte trajtuar herë pas here në këtë klinikë dhe para saj në klinika serbe.
Lidhur me rastin, nga Qendra e Mjekësisë Familjare në Viti nuk kanë dhënë detaje.
Sipas raportit të Policisë, vdekja e saj u konstatua në Emergjencë ndërsa trupi më pas ishte dërguar për obduksion.
Të afërmit e 52-vjecarës nuk kanë dashur që të prononcohet për televizionin, ndërkaq ajo u varros në varrezat e fshatit Vërbovc, të dielën./Dukagjini