Pas sulmit ndaj policëve në veri, EULEX-i do t'i shtojë patrullimet

Njësia policore e Stacionit Policor për Mbikëqyrjen e Kufirit në Zubin Potok është sulmuar sot me armë zjarri.

Derisa ata kanë qenë duke vendosur një barkë patrulluese në Liqenin e Ujmanit, policia kanë thënë se drejt tyre është shtënë me përafërsisht 10 plumba.

Lidhur me këtë sulm, shefi i EULEX-it në Kosovë, Lars-Gunnar Wigemark ka reaguar në Twitter.

Ai këto sulme i ka cilësuar si vepra kriminale dhe ka thënë se duhet të ndalen menjëherë.

Madje, tutje Wigemark ka shtuar e EULEX do e shtojë patrullimin në këtë zonë të Kosovës.

“Të shtënat e sotme në liqenin e Gazivodës/Ujmanit janë edhe një sulm me armë zjarri ndaj Policisë së Kosovës. Askush nuk u lëndua, por këto sulme jo vetëm që janë të rrezikshme, janë vepra kriminale dhe duhet të ndalen menjëherë. @EULEXKosovo do të shtojë patrullimet e saj në zonë”, thuhet në reagimin e Wigemark.

Në njoftimin e Policisë së Kosovës të lëshuar gjatë ditës së sotme është thënë se të shtënat kanë qenë të njëpasnjëshme, nga pjesa tjetër e liqenit dhe kanë goditur afër barkës së policisë.

“Nga këto të shtëna nuk ka persona të lënduar”, thuhet në njoftimin e policisë.

Në asistencë të njësisë policore ka shkuar Njësia e Ndërhyrjes së Shpejtë e Policisë Kufitare. Policia po vazhdon të vëzhgojë terrenin dhe ta trajtojë rastin.

“Policia e Kosovës mbetet e përkushtuar në ofrimin e sigurisë dhe luftimin e kriminalitetit e me theks të veçantë të kontrabandës në atë zonë”, përfundon njoftimi i policisë.

Today’s shooting at Lake Gazivoda/Ujmani is yet another attack with fire arms on the Kosovo Police. Nobody was injured, but these attacks are not only dangerous, they are criminal acts and need to cease immediately. @EULEXKosovo will increase its patrols in the area.

— Lars-Gunnar Wigemark (@LarsGWigemark) August 6, 2022