Pamje - Projekti i urës i cili pritet të afrojë Velipojën me Ulqinin
Shqipëria dhe Mali i Zi kanë rënë dakord për ngritjen e një ure mbi lumin Buna.
Ajo do jetë një pikë e afërt lidhjeje me Velipojën në Shqipëri dhe Ulqinin në Malin e Zi. Ura e gjatë 310 metra do të shkurtojë distancën me dy qendrat turisitike nga 67 që është sot në rreth 20 kilometra.
Kryeministri i Shqipërisë, Edi Rama ka publikuar sot projektin i cili do të financohet nga dy qeveritë.
“Me projektin e “Urës mbi Bunë”, një projekt i bërë gati për zbatim nga Fondi Shqiptar i Zhvillimit, i cili do të bashkëfinancohet nga dy qeveritë, për të lidhur vendet tona duke shkurtuar distancën mes Velipojës e Ulqinit nga 73km në 300m, si edhe duke i dhënë një shtysë të re lirisë së lëvizjes, turizmit dhe ekonomisë ndërkufitare, ju uroj një ditë të bukur” – ka shkruar kryeministri shqiptar në rrjetin social “Facebook”, duke bashkangjitur video të projektit.
Projekti i prezantuar nga kryeministri Edi Rama dhe Dritan Abazoviq, në Ohër vitin e kaluar, pritet të ndërtohet në gusht të vitit 2024.