Kroacia duhet ta konfiskojë këtë simbol lundrues të korrupsionit të oligarkëve

Mega jahti 92 metra i gjatë, The Royal Romance, në pronësi të një oligarku ukrainas, i ankoruar në qendër të Rijekës, Kroaci, përfaqëson një simbol shkëlqyes të pasurisë dhe korrupsionit të dukshëm të oligarkëve të Ukrainës, ndërsa popullsia ukrainase po bombardohet.

I blerë për më shumë se 200 milionë dollarë amerikanë, pronari i jahtit është oligarku ukrainas dhe aleati i ngushtë i Putinit, Viktor Medvedchuk. Që nga 24 shkurti, ai ka marrë një simbolikë të re, duke theksuar se pas justifikimeve për luftën në Ukrainë, lufta synon gjithashtu të mbrojë një sistem që ka lejuar një grusht burrash të grabisin pasuri të pabesueshme pa u ndëshkuar.

Unë jetoj në Rijeka dhe gjatë vitit të kaluar kam qenë i vetëdijshëm se ky jaht i madh, gjithmonë i papërlyer, nuk duket se shkon gjëkund.

Ky simbol i korrupsionit më acaron nervat sa herë që e shoh, sidomos pasi aty pranë shoh edhe pensionistë të cilët përpiqen të shtojnë pensionet e tyre të pakta duke kontrolluar koshat e plehrave në kërkim të shisheve të riciklueshme.

Pra, edhe pse s’më kanë interesuar ndonjëherë në veçanti jahtet, isha kurioz të kontrolloja pronësinë dhe vlerën e tyre në internet. Një vit më parë, mësova se ai i përkiste një oligarku ukrainas për të cilin nuk kisha dëgjuar kurrë, por mund ta përdorja si një shembull konkret për të edukuar vajzën time 10-vjeçare për realitetin e pabarazisë globale, duke e ndihmuar atë të llogarisë se ky jaht kushton më shumë se 2,000 apartamente mesatare në Rijeka, por ka hapësirë ​​vetëm për 14 të ftuar!

Që nga pushtimi i 24 shkurtit, i kam kushtuar më shumë vëmendje dhe tani e di se kush është pronari, përtej emrit të tij.

Viktor Medvedchuk drejton partinë kryesore opozitare në Ukrainë dhe presidenti Putin është kumbari i vajzës së tij. Disa artikuj lajmesh kanë sugjeruar se ai është një kandidat i mundshëm për të kryesuar një qeveri kukull në emër të Vladimir Putin.

Medvedchuk është nën sanksionet e SHBA-së dhe Ukrainës. I akuzuar për tradhti në Ukrainë, ai ishte nën arrest shtëpiak në Kiev që nga marsi i kaluar, gjë që me sa duket shpjegon mungesën e përdorimit të jahtit të tij privat. Megjithatë, duket se ai u arratis, ndoshta jo pa arsye, “për arsye sigurie”, disa ditë pas fillimit të bombardimeve të Kievit.

Që nga fillimi i konfliktit, Franca, Italia dhe Gjermania kanë bërë lëvizje për të konfiksuar jahte të ngjashme në pronësi të oligarkëve rusë. Deri më tani, oligarkët ukrainas nuk janë shënjestruar nga BE-ja, pavarësisht rolit të tyre në korrupsionin madhor dhe në aftësimin e presidentit Putin.

Çdo gjë që shton shanset për t’i dhënë fund këtij konflikti më shpejt se sa vonë duhet të jetë një gjë e mirë; por kjo do të thotë gjithashtu se jahti i Medvedchuk është i lirë të largohet nga Rijeka sa herë që ai dëshiron.

Ndërsa nuk është më pjesë e BE-së, Britania e Madhe duhet të jetë e interesuar t’i shkojë nga pas pasurisë së oligarkëve. The Royal Romance mban një flamur të Ishujve Kajman. Si një territor jashtë Mbretërisë së Bashkuar, flamuri i jahtit përmban edhe flamurin e Mbretërisë së Bashkuar, i cili valvitet në pjesën e pasme të jahtit.

Mirëmbajtja e një jahti nuk kushton pak. Zakonisht ajo kushton 10% të vlerës së anijes në vit. Zoti Medvedchuk ka të ngjarë të paguajë rreth një milion dollarë në muaj, mbi 100,000 dollarë amerikanë çdo tre ditë, për të mirëmbajtur jahtin e tij. Pa dyshim që kjo kanalizohet përmes Ishujve Kajman. Qeveria britanike ka për detyrë të pyesë se nga vijnë këto para dhe si shkojnë në Rijekë.

Në realitet, ndjekja e pasurive të oligarkëve nuk ka të ngjarë të ndryshojë sulmin e Putinit ndaj Ukrainës. Oligarkët mund të varen nga Putini për pasurinë e tyre, gjë që i bën ata të bindur dhe jo me ndikim. Megjithatë, mbetet fakti që korrupsioni endemik në zemër të sistemit politik rus është një shkak kryesor i destabilitetit dhe paqja afatgjatë varet nga zgjidhja e tij, jo vetëm në Rusi, por edhe në Ukrainë dhe vende të tjera.

Moralisht, është e drejtë që jahtet dhe vilat t’u konfiskohen dhe t’u kthehen popujve ukrainas dhe rus, të cilët në mënyrë indirekte kanë paguar për to, edhe nëse kjo nuk mund të pritet të ndikojë në konfliktin e ndezur në Ukrainë.

Në Rijeka, do të më pëlqente të shihja sekuestrimin e këtij jahti në veçanti. Ai ose mund të shitet dhe të ardhurat të përdoren për të ndihmuar ata që janë prekur nga konflikti, ose të përdoret për strehimin e refugjatëve nga Ukraina.

Medvedchuk po paguan goxha para për mirëmbajtjen e këtij jahti, kështu që do të ishte e përshtatshme nëse të paktën 14 bashkatdhetarë të tij do të mund të përfitonin prej tij.

Nëse do ta shihja këtë jaht të përdorej për të strehuar refugjatë, do të buzëqeshja, në vend që të ngërdheshesha sa hera ta shihja. Megjithatë, e kuptoj se ky është thjesht interesi im egoist. Unë nuk jam nga ata njerëz që po vuajnë në Ukrainë dhe nuk kam fjalë për këtë. Duhet të vendosin ukrainasit.

Qeveria kroate ka një mundësi të shkëlqyer për të punuar me qeverinë ukrainase për të gjetur një mënyrë për të konfiskuar The Royal Romance dhe për ta përdorur sa më mirë këtë mjet të vlefshëm, por përndryshe të padobishëm lundrues alumini./Reporter.al.

(Opinionet e shprehura janë vetëm ato të autorit dhe jo domosdoshmërisht pasqyrojnë pikëpamjet e BIRN)