Haradinaj Stublla e vlerëson njohjen nga Izraeli arritje të jashtëzakonshme
Ministrja në detyrë e Punëve të Jashtme, Meliza Haradinaj Stublla ka thënë se njohja nga Izraeli është një arritje e jashtëzakonshme për shtetësinë e Kosovës, pas disa vitesh fushate agresive ilegale të Serbisë.
Haradinaj Stublla shtoi se kjo njohje ka ardhur falë përkushtimit të administratës Amerikane Trump, dhe përkrahjes së fuqishme tani nga administrata e re Biden/Blinken.
“Rreshtimi i përhershëm i Republikës së Kosovës me Amerikën, gjithmonë na është shpërblyer me forcim, zhvillim, e konsolidim të shtetësisë sonë brenda dhe jashtë, dhe kjo për qytetarët është fakt i mirënjohur dhe i pakontestueshëm. Njohja nga Izraeli – ka hedhur poshtë të gjitha pretendimet për të bërë paralele të Kosovës me raste të tjera në botë, për të ushqyer argumentet e shteteve mos njohëse”, tha ajo.
Ministrja në detyrë shtoi se Kosova nuk është as Palestinë, as Kataloni, as Nagorno-Karabakh, as Oseti Jugore, por është “SUI GENERIS – RAST UNIK”.
Sipas saj ky konfirmim, hap horizonte të reja me shtete mos-njohëse në të gjitha kontinentet, për arritjen e njohjes universale dhe etablimit final të Republikës së Kosovës në shoqërinë ndërkombëtare duke shtuar se do të vazhdojnë me intensitet të shtuar për arritje të reja.
“Sa i përket hapjes së Ambasadës në Izrael, Republika e Kosovës nuk ka pasur më parë përfaqësi diplomatike në Tel Aviv dhe nuk bëhet fjalë për zhvendosje nga Tel Avivi në Jeruzalem. Kosova respekton praktikat dhe ligjet e shtetit pritës gjatë procesit të themelimit të misionit diplomatik, por edhe me krenari rreshtohet pas politikës së jashtme Amerikane.
Veprimet ekspeditive të MPJD-së së Kosovës për të formalizuar njohjen me Izraelin dhe vendosur ambasadën në Jeruzalem para Serbisë, sipas Haradinaj Stublla, është ndryshim i madh paradigme, që zbardh 2 të vërteta për Serbinë.
“1. Shpërfaqjen e saj si shtet që NUK u përmbahet marrëveshjeve që nënshkruan (Marrëveshja e Uashingtonit); dhe 2. Mos-sinqeritetin e saj për partneritet të ri me Amerikën”, shtoi Haradinaj Stublla.
Haradinaj Stublla shtoi se ata që duan ta largojnë Kosovën nga Amerika, duan ta bëjnë Kosovën si Serbia – që nuk i respekton marrëveshjet e zotimet e marra përsipër, dhe shtet që i kundërvihet Amerikës kundër vetvetes.
“Nuk do t’i lejojmë”, tha ajo.
“Ata që po synojnë zhbërjen e vlerës themelore të demokracisë së Kosovës – pluralizmit – përmes zaptimit të të gjitha institucioneve të shtetit, duan që Presidenti edhe Krye-Parlamentari të kontrollohet nga Kryeministri – dhe këtë NUK DO TA LEJOJMË! Ata që na e sollën ‘çnjohjen’ nga Sierra Leone, dhe skandalin me Xhamajkën, tani duan që ta zhbëjnë edhe njohjen nga Izraeli, dhe miqësinë e përhershme e të shenjtë me SHBA. NUK DO T’I LEJOJMË”, tha ajo
Hatradinaj Stublla shtoi se Kosova është vend demokratik.
“Jemi këtu për të garantuar se Kosova do të vazhdojë të mbetet vend demokratik e jo autoritar, përkundër pangopësisë së disave për të pushtuar krejt pushtetet. Mbetemi këtu për të forcuar e lartësuar shtetin. Ata që duan të kundërtën, le t’i bashkohen Serbisë e Rusisë”, përfundoi Haradinaj Stublla.
