Gjykata Themelore e Pejës - Foto: KALLXO.com
Gjykata e Pejës njoftohet me kërkesën e Kryeprokurorit për rihapje të rastit së Agonis Tetajt
Gjykata e Pejës e ka pranuar kërkesën e Zyrës së Kryeprokurorit të Shtetit që Gjykata e Pejës mos ta shpallë të përfunduar gjykimin për vrasjen e Agonis Tetajt.
Kjo është konfirmuar për KALLXO.com nga zyrja e informimit të kësaj gjykatë.
Sipas zëdhënëses për informim, Tringa Zhuti nesër pritet të shihet cili është vendimi se a do rihapet shqyrtimi apo do të shpallet aktgjykimi.
“Lidhur me pyetjet e parashtruara nga ana juaj, ju njoftoj se nesër, me datë 19.03.2021, është caktuar që të bëhet shpallja e vendimit dhe mbetet të shihet nesër se cili do të jetë vendimi i trupit gjykues, a do të vendos që të rihapet shqyrtimi gjyqësor apo do të shpallet aktgjykimi” thuhet në përgjigjen e Gjykatës.
Kryeprokurori i shtetit, Aleksandër Lumezi sot ka njoftuar se pas videos dhe reagimeve të djeshme e dyshimeve për mos trajtim të duhur të rastit të vrasjes së Agonis Tetaj nga ana e prokurorit Agron Uka, ka vendosur që ta përjashtojë prokurorin Uka nga ndjekja penale e kësaj çështje dhe të njëjtën çështje të ia kalojë një prokurori tjetër.
“Si Kryeprokuror i Shtetit jam i shqetësuar dhe njëkohësisht i gatshëm që drejtësia të shkojë në vend. Prandaj, për të parandaluar njëanshmërinë dhe për t’iu shmangur paragjykimeve për rastin e vrasjes së Agonis Tetajt, sot kam marrë vendim që brenda kompetencave të mia ligjore të marrë lëndën nga prokurori i çështjes dhe ta ri caktoj atë te një prokuror tjetër”, thuhet në njoftimin e zyrës së Kryeprokurorit të Shtetit.
Në të njëjtën kohë Kryeprokurori i Shtetit ka deklaruar se do të kërkoj nga trupi gjykues që të mos e shpall aktgjykimin pasi që do të kërkojë që të bëhen hetime të mëtutjeshme për të marrë prova të tjera të nevojshme për zbardhjen e rastit.
Videoja e vrasjes së Agonis Tetjat në kompaninë “Gogaj AG” u bë dje publike nga prindi i të ndjerit pasi prokurori Agron Uka e lehtësoi veprën nga “vrasje e rëndë” në “vrasje nga pakujdesia”. Isuf Tetaj përmes një shkrimi publik drejtuar kryeprokurorit të shtetit, mediave dhe ambasadave ka shprehur pakënaqësinë e tij me veprimin e prokurorit i cili e konsideroi nga pakujdesia vrasjen e birit të tij.
Aktakuza përshkruan se pas nxjerrjes së revoles Shaban Gogaj e vendos karikatorin dhe e merr në shenjë të ndjerin Agonis Tetaj në kokë dhe e qëllon duke e lënë të vrarë. Pasi kjo aktakuzë u ndryshua nga prokurori Agron Uka duke e cilësuar këtë vrasje si nga pakujdesia i akuzuari Gogaj e pranoi fajësinë.
Disa orë pas publikimit të pamjeve të vrasjes së Agonis Tetajt, KALLXO.com ka pranuar një foto ku pretendohet se shihet avokati i familjes Gogaj dhe prokurori i rastit Agron Uka, duke qëndruar në një kafiteri.
Vrasja e Agonis Tetajt, prokurori Uka dhe avokati Berisha flasin për fotografinë ku shihen në kafe