Foto: Urim Krasniqi/KALLXO.com
Detaje, si ndodhi plaçkitja e automjetit të Postës së Kosovës
Mëngjesin e sotëm, një automjet i Postës së Kosovës është plaçkitur në fshatin Dardhishtë të Obiliqit.
Ende nuk dihet sasia e vjedhur e parave ndërsa forcat e rendit kanë ndal në vendin e ngjarjes për ta hetuar rastin. Rasti, sipas Policisë së Kosovës ndodhi rreth orës 08:30.
“Pas marrjes së informacionit policia ka dalë në vendngjarje dhe bazuar në të dhënat e para janë ngritur dyshimet se grabitja është kryer prej dy personave të dyshuar, të cilët nën kërcënimin e armës( revole), kanë grabitur një sasi parash, nga punëtorët e PTK-së, të cilët me veturë zyrtare po transportonin paratë në një lokacion të caktuar”, tha të premten Policia e Kosovës për KALLXO.com.
Nuk raportohet për persona të lënduar.
Ndërkohë, rasti është konfirmuar edhe nga zyra për medie e Postës së Kosovës por pa dhënë shumë detaje.
“Gjatë zhvillimit të aktiviteteve të rregullta, sot është sulmuar një automjet i Postës së Kosovës, në Kastriot. Deri në përmbyllje të hetimeve nga Policia e Kosovës, në interes të mosndërhyrjes në proces, nuk mund të ju ofrojmë informata të tjera”, thuhet në përgjigjen e zyrës për media të Postës së Kosovës.
www.kallxo.com