Ilustrim
ATK zhvillon kontrolle për punëtorë pa kontrata edhe natën, kontrollohet një piceri në Prishtinë
Administrata Tatimore e Kosovës është duke zhvilluar aksione në mbarë Kosovën për verifikimin e kontratave të punës së punëtoreve nëpër biznese të ndryshme, të cilat janë duke funksionuar gjatë kohës së pandemisë.
Një aksion i tillë u zhvillua para pak çastesh në një piceri në komunën e Prishtinës, e cila po ushtron aktivitetin pas orës 18:00.
Ky kontroll i ATK-së erdhi pasi gjatë ditës u raportua në KALLXO.com se në këtë biznes janë të angazhuar punëtorë pa kontrata pune.
Për verifikimin e këtyre informacioneve me urdhër të zëvendësdrejtorit të përgjithshëm të ATK-së, Nijazi Asllani, u caktua një ekip i inspektorëve tatimorë.
Kontrolli rezultoi me konstatimin e parregullsive. Biznesi po ushtronte aktivitetin pa lëshuar kuponë fiskalë, ndërsa për verifikimin e saktë të punëtoreve mbetet që ATK t’i krahasoje punëtoret e hasur në lokal me punëtorët e deklaruar në sistemin e ATK-së.
Për konstatimet në terren biznesi do të ndëshkohet.
Përpos këtij biznesi, kontroll tatimor për punëtorë të padeklaruar u zhvillua edhe në një nga lulishtet e regjionit të Prishtinës.
Në bazë të informacioneve të raportuara në KALLXO.com, deri më tani janë konstatuar 13 punëtorë pa kontrata pune në tre biznese të ndryshme.
Nëntë punëtorë pa kontrata u konstatuan në biznesin e sigurimeve fizike ndërsa nga dy punëtorë pa kontrata u konstatuan në një auto parking në Prishtinë dhe në biznesin e taksive.
Kontrollet për verifikimin e kontratave të punës së punëtoreve kanë filluar nga koha kur Qeveria e Kosovës e miratoi pakon emergjente fiskale me të cilën pritet t’u dalë në ndihmë edhe mijëra punëtorëve në sektorin privat.
Nga fillimi i vitit 2020 e deri në muajin prill, Administrata Tatimore e Kosovës ka shqiptuar mbi 90 mijë euro gjoba nga raportimet e qytetarëve në KALLXO.com.
KALLXO.com inkurajon të gjithë ata të cilët nuk kanë kontrata pune të raportojnë në platformën tonë dhe në ATK.