QKK-ja hap konkursin për mbështetje të projekteve filmike
Qendra Kinematografike e Kosovës ka hapur sot konkursin për mbështetje të projekteve filmike në 12 kategori.
Përmes një njoftimi, QKK-ja ka bërë të ditur se këtë vit këtij konkursi i janë shtuar edhe dy kategori të reja: kategoria e zhvillimit të skenarit për film të metrazhit të gjatë artistik dhe të animuar si dhe kategoria për film të shkurtër studentor.
Po ashtu, sipas QKK-së, risi e këtij konkursi është edhe zgjerimi i mbështetjes në bashkëprodhimin minor, ku këtë vit përfshihet edhe filmi dokumentar.
“E njëjta vlen edhe për kategorinë post-produksion për film të metrazhit të gjatë, të cilit i shtohet edhe filmi dokumentar. Ndërkaq, tash e tutje, skenaristët kanë mundësinë të aplikojnë për mbështetje si skenaristë të pavarur në kategorinë zhvillim i skenarit”-thuhet në njoftimin e QKK-së.
Kineastët këtë vit kanë mundësi të konkurrojnë me projektet e tyre në kategoritë e më poshtme:
– Film i metrazhit të shkurtër artistik
– Film i metrazhit të gjatë – për regjisorët debutantë
– Film i metrazhit të gjatë – dokumentar
– Film i metrazhit të gjatë – artistik
– Zhvillim i skenarit për film të metrazhit të gjatë – artistik dhe i animuar
– Film i metrazhit të gjatë – i animuar
– Post-produksion për film të metrazhit të gjatë – artistik dhe dokumentar
– Bashkëprodhim minor për film të metrazhit të gjatë
– Zhvillim i projektit për film të metrazhit të gjatë – artistik, dokumentar dhe të animuar
– Film i metrazhit të shkurtër – dokumentar.
Aplikimi në këtë konkurs bëhet online përmes faqes zyrtare të QKK. Afati i aplikimit për mbështetje të projekteve filmike zgjat deri më 24.1.2024.
Sipas Ligji për buxhetin për 2024, QKK ka në dispozicion rreth 1 milion e 600 mijë euro për mbështetje të projekteve filmike.
Konkursi për mbështetje të projekteve filmik është shpallur pas miratimit të Ligjit të ri për kinematografinë dhe rregullores nr. 02/2023 për konkurset dhe mbështetjen financiare të veprave filmike dhe audio-vizuale dhe rregullores nr. 03/2023 mbi punën e jurive vlerësuese dhe komisioneve për mbështetje të projekteve konkurruese.