Pretendimi i rrejshëm se njëri nga të arrestuarit në MINT është dhëndrri i Bedri Hamzës

Burri i vajzës së vëllait të Bedri Hamzës është arrestuar në operacionin në MINT

Me 18 gusht 2023 një profil në Facebook me emrin Qendrim Krasniqi, përmes një statusi shkroi se njëri nga tre të arrestuarit për keqpërdorime të rezervave shtetërore në Ministrinë e Industrisë, Ndërmarrësisë dhe Tregtisë (MINT), Irfan Lipovica është dhëndri i kryetarit të Mitrovicës, Bedri Hamzës.

Ai shkroi se vajza e vëllaut të Bedri Hamzës është e martuar me Irfan Lipovicën i cili u arrestua.

Ky pretendim është shpërndarë edhe nga profile të tjera si Gazeta Ora, Albini për Kryeministër, Xhemë Kiqina, Specbuk.  

“I arrestumi Irfan Lipovica eshte dhenderr i Bedri Hamzes. E kete qvajzen e vellaut te Bedri Hamzes, e martuar me Lipovicen Vlora Qitaku e pat punesuar ne Ministri te Integrimeve Evropiane kur ka qene Ministre Pra Pdk-ja i ka rrenjet gjidokund ku ka dallavere.A po doni me dite per te arrestuarin tjeter qe vjen nga LDK??A i perjashtuan nga LDK e PDK te arrestuarit e sotem a ende jo”- shkruhet në postimin të datës 18/08/2023 në faqen Gazeta Ora.

Krypometetri ka kontrolluar faktet në këto postime. Të dhënat e grumbulluara tregojnë se me datë 18/08/2023 i apostrofuari Bedri Hamza në një postim në Facebook ka ofruar të dhëna se vajza e tij dhe vajza e vëllait të tij nuk janë të martuara me Irfan Lipovicën.

“Për sqarim për opinionin, unë i kam dy vajza dhe nuk janë të martuara dhe kam vetëm një vëlla i cili e ka vetëm një vajzë që as nuk është e martuar e as nuk punon, është studente në vitin e tretë në fakultet”- thuhet në postimin e dats 18/08/2023 të shpërndarë në facebook profilin e Bedri Hamzës.

Krypometri ka realizuar një bisedë telefonike me datë 19/08/2023 me Bedri Hamzën për të kërkuar të dhëna shtesë që argumentojnë postimin e tij në facebook. 

“Unë e kam bo sqarimin tim publik në Facebook, edhe kam thënë që unë kam dy vajza, të dyja janë të pamartuara, unë e kam vetëm një vëlla dhe ai e ka vetëm një vajzë. Ajo as nuk është e martuar e as nuk punon, është studente në vitin e tretë”– ka ripërsëritur Hamza.

Ai është pyetur nëse ka lidhje familjare me Valentina Hamza. 

“Jo, Valentina Hamzën nuk e kam mbesë. Ajo mund të jetë nga Klina e Epërme, e unë jetoj në Mitrovicë. Unë vendlindjen e kam në Klinë, mua më vjen keq që pjesën më të madhe të atyre njerëzve atje nuk i njoh. Unë mund të konfirmoj se me këtë emër, as nuk e kam vajzë të axhës, as vajzë të djemve të axhës. Nuk po di me kallxu, por nuk e di ku lidhem në gjak. Ai ka qenë shumë specifik, ai ka thënë vajza e vëllaut tem”– ka thënë tutje Hamza.

Kryetari i Mitrovicës ka bërë të ditur se tashmë ka autorizuar avokatin që personi Qendrim Krasniqi të paditet për shpifje.

Pretendimin e shpërndarë nëpër rrjetet sociale për Krypometrin e ka demantuar edhe vetë vëllau i Bedri Hamzës, Bahriu.

Ai ka thënë se asgjë në atë postim nuk është e vërtetë, sepse vajza e tij as nuk është as e martuar e as e punësuar.

“Ne jemi vetëm dy vëllezër, e kam vetëm një vajzë, quhet Merita Hamza, është në vitin e tretë të Fakultetit të Mjekësisë. Nuk është e punësuar, nuk është e martuar. Unë e kam pa atë postim propagandues. Normal, është shqetësuese sepse është njollosje e familjes pa arsye, edhe vajza nuk është ndi mirë. Por për këtë rast, le të merren organet e drejtësisë, unë e demantoj sepse nuk është kurgjo e saktë se çka ka shkrujt, edhe nuk qëndron”– ka thënë Bahri Hamza për Krypometrin me datë 19/08/2023.