Citati i rremë që i është mveshur kryeministrit Albin Kurti
Deklarata
Të lirë jeni prej sotit
Vlerësimi
Rrenë
Fotografia me përshkrimin “të lirë jeni prej sotit” është e rreme. Fotografia është e ndryshuar dhe ka përshkrim të rremë. Kryeministri i Kosovës, Albin Kurti, asnjëherë nuk ju ka thënë punëtorëve të kompanisë “Art Motion” se janë “të lirë prej sotit”.
Artikulli
Më 24 qershor 2023 faqja e Facebook-ut Power Shqip ka publikuar një fotografi në të cilën shihen disa zyrtarë duke folur në telefon dhe në pjesën e poshtme të fotos është kryeministri i Kosovës, Albin Kurti i cili po ashtu është duke folur në telefon.
Në fotografinë e parë është paraqitur gjoja qendra e thirrjeve të kompanisë “Art Motion”, ndërsa në pjesën e dytë të fotografisë është kryeministri Albin Kurti që gjoja ka thënë “të lirë jeni prej sotit”.
Një ilustrim i tillë është bërë pas publikimeve rreth kompanisë “Art Motion” dhe reagimeve të gazetarëve dhe shoqërisë civile për tentim të mbylljes së një televizioni.
Por, fotografia është e ndryshuar, pasi në pjesë e parë të saj nuk është qendra e thirrjeve të “Art Motion”, pasi është një fotografi që është në shitje dhe që mund të përdoret për ilustrim.
Krypometri ka kërkuar një përgjigje nga Arlind Manxhuka, zëdhënësi i Lëvizjes Vetëvendosje. Ai ka thënë se kryeministri i Kosovës dhe kryetari i Lëvizjes Vetëvendosje asnjëherë nuk ka thënë se “të lirë jeni prej sotit”, si pretendohet në këtë fotografi.
