A ka raste të dhunës nga mësimdhënësit ndaj nxënësve në shkollat e çerdhet e Prizrenit?
Luljeta Veselaj-Gutaj, drejtoreshë e Arsimit në Prizren, ka treguar se që nga marrja e mandatit të saj e deri më sot nuk ka pasur asnjë rast të raportuar ku dyshohet se ka pasur dhunë ndaj nxenësve nga mësimdhënësit në çerdhe apo shkolla të këtij qyteti.
Veselaj-Gutaj ka thënë në “Kallxo Përnime” se me të marrë detyrën ka iniciuar punimet në rregulloren e institucioneve arsimore në Komunën e Prizrenit, kjo pasi sipas drejtoreshës kësaj komune i ka munguar një rregullore e tillë.
“Rregullorja, përpos rregullave, përgjegjësive dhe detyrave të secilit pejsëmarrës në sektorin e arsimit parasheh edhe masat disiplinore ndëshkuese” – ka thënë drejtoresha.
Tutje ajo tregoi se kjo rregullore ende nuk është votuar nga Kuvendi Komunal i Prizrenit, pasi është në përkthim.
Drejtoresha tregoi se janë në fazën finale për këtë rregullore.
Veselaj-Gutaj tregoi se Prizreni ka një komision që trajton ankesat dhe kërkesat e drejtorëve, prindërve dhe nxënësve.
Ajo tha se ka mësimdhënës që u janë shkëputur kontratat, drejtorë që kanë marrë vërejtje e po ashtu edhe punëtorë teknikë që kanë marrë vërejtje.
