Babimost,- Foto: KALLXO.com
Vrasje në Babimost
Një person është pranuar sot në QKUK pa shenja jete dhe me plagë të armës së zjarrit.
Lajmi për atë që policia e cilëson vdekje të dyshuar, është bërë i ditur nga zëdhënësja e Policisë Rajonale të Prishtinës Florie Ahmeti-Haziraj.
“Rreth ores 14:00, policia ka marrë informatën se një person rreth 35 vjeç, me plagë nga arma e zjarrit dhe pa shenja jete është pranuar në QKUK Prishtinë”, tha Ahmeti- Haziraj.
Ngjarja, sipas saj, ka ndodhur në fshatin Babimost të Obiliqit.
“Kësisoj nga informacionet e para që ka siguruar policia është bërë e ditur se ngjarja ka ndodhur në fshatin Babimoc – komuna e Obiliqit”, vijoi shpjegimi i zëdhënëses së policisë.
Ahmeti-Haziraj bëri me dije se policia ka ndërmarrë veprime për ta sqaruar rrethanat e kësaj ngjarjeje,
“Menjëherë njësitë policore kanë ndërmarrë veprimet e nevojshme operative e hetimore për të sqaruar dhe hetuar rrethanat e kësaj ngjarjeje”, tha Ahmeti-Haziraj për KALLXO.com.
Ajo tregoi se po punohet për identifikimin e të përfshirëve në këtë rast.
Në Babimost edhe në janar të këtij viti ishin gjetur të vdekur dy persona.