Vazhdon Kërkimi i Personit që ra nga Ura në Gjakovë

Drejtoria për Mbrojtje dhe Shpëtim e Komunës së Gjakovës njofton se aktivitetet në kërkimin e trupit të personit të vetëhedhur nga ura mbi lumin “Erenik” janë duke vazhduar në mënyrë intensive.

Sipas një njoftimi të Komunës së Gjakovës, përkundër kërkimeve të pandërprera dyjavore të realizuara nga ekipet e specializuara të zhytësve të FSK-së, të ndihmuar edhe nga Shërbimi Zjarrfikës i Gjakovës, ato deri më tani kanë rezultuar të pasuksesshme.

“Pas një analize detale të veprimeve dhe operacioneve të deritanishme në këtë drejtim, Komuna e Gjakovës në koordinim me Komandën e Regjimentit të Mbrojtjes Civile të FSK-së, morën qëndrim që ato të mos ndërpriten dhe të vazhdohet me kërkimin e trupit të viktimës së supozuar edhe në ditët në vijim”, thuhet në njoftim të Komunës së Gjakovës.

Kujtojmë se më 5 janar të këtij viti një person ka rënë në lumin Erenik te ura që lidh qytetin e Gjakovës me fshatin Moglicë.

Personi është një i moshuar i moshës 88 vjeçare/21Media.