Nuk Paraqitet në Punë për 3 Muaj, Dedushaj Suspendohet nga Puna

Naim Dedushaj, drejtori i Departamentit të Hulumtimeve dhe i Përkrahjes së Investimeve të Diasporës në Ministrinë e Diasporës është suspenduar nga puna për dy muaj.

Në ministrin e Diasporës thonë se i njëjti është amnistuar nga sekretari i kaluar i kësaj ministrie, përkundër gjetjeve të Auditorit të Brendshëm për mungesën e tij në punë.

Ministria e Diasporës udhëhiqet nga Dardan Gashit. Në mandatin e kaluar, kjo ministri është udhëhequr nga Valon Murati.

Lajmi për suspendimin e tij është konfirmuar nga zyrtarët e ministrisë së Diasporës.

“Raporti i Auditorit të Brendshëm kishte konstatuar mos-regjistrimin e Naim Dedushajt në sistemin elektronik të vajtje-ardhjes për një periudhë të gjatë kohore, së paku 3 muaj”, tha Kreshnik Berisha, këshilltar politik i Ministrit të Diasporës.

Berisha e ka akuzuar ish-sekretarin e ministrisë së Diasporës, Osman Shahini se e ka amnistuar Dedushajnë. Edhe Shahini ishte pezulluar nga puna në fillim të muajit nëntor të vitit të kaluar nga Ministri Gashi.

“Përderisa Sekretari i mëparshëm i ministrisë nuk ka ndërmarrë asnjë masë dhe mbi bazën e vërejtjeve të vazhdueshme, u.d të Sekretarit të Përgjithshëm pak javë më parë ka iniciuar rastin në Komisionin Disiplinor, për shkelje të rregullores 05/2010”, tha këshilltari i ministrit Dardan Gashi.

Ai tha se Komisionit Disiplinor ka konstatuar se “me veprimet e lartpërmendura zyrtari Dedushaj ka bërë shkelje sistematike të nenit 7 paragrafi 1 të Rregullores nr. 05/2010 për orarin e punës”.

Pas përfundimit të suspendimit për periudhën kohore 2 mujore, sipas vendimit të Komisionit Disiplinor, Dedushaj parashihet të kthehet në vendin e punës.

KALLXO.com ka tentuar të kontaktojë edhe me zyrtarin e suspenduar, Naim Dedushaj përmes telefonit dhe email-it, por nuk ka marrë përgjigje deri në momentin kur ky shkrim është publikuar.

Ai ka thënë se gjendet në Shtetet e Bashkuara të Amerikës dhe se kur të kthehet në Kosovë do të flas rreth suspendimit të tij.