Lojtarë të kombëtares shqiptare - Foto: FSHF
Kosova Humb si Nikoqire, Shqipëria Barazon si Mysafire
Përfaqësuesja e Kosovës ka pësuar humbjen e shtatë rresht në kualifikimet për Botërorin “Rusia 2018”.
Në ndeshjen e kthimit me Finlandën, të zhvilluar në stadiumin “Loro Boriçi” në Shkodër, në kuadër të Grupit I, Kosova humbi me rezultat minimal 1 me 0.
Golin e vetëm për mysafirët e shënoi Teemu Pukki në minutën ’83.
Kështu, përfaqësuesja e Kosovës mbetet e fundit në tabelë me vetëm një pikë të marrë nga ndeshja e kaluar pikërisht me Finlandën, saktësisht një vit më parë.
Ndërsa, kombëtarja e Shqipërisë ka barazuar në ndeshjen me Maqedoninë fqinje.
Ndonëse avancoi me golin e Odise Roshit në minutën ’53, përfaqësuesja shqiptare humbi 3 pikët pas golit të shënuar nga penalltia nga Aleksandar Trajkovski në mënutën ’78.
Loja, e vlefshme për Grupin G, u zhvillua në Strumicë.
Pas kësaj ndeshjeje, Shqipëria mbetet e treta në grup ndërsa Maqedonia e parafundit.