Këshilltarja e Haradinajt: Kosovës Nuk i Duhet Gjykatë Raciste

Këshilltarja për Politikë të Jashtme e Kryeministrit të Kosovës, Ramush Haradinaj, e ka quajtur “raciste” Gjykatën Speciale të votuar nga Kuvendi i Kosovës në gusht të vitit 2015, gjatë legjislaturës së kaluar.

Një ditë pasi 43 deputetë deponuan një kërkesë për shfuqizimin e Ligjit që e themelon këtë gjykatë, Meliza Haradinaj, këshilltare e kryeministrit, ka komentuar në Twitter rreth kësaj gjykate.

“Kosovës i duhet një e vërtetë përfundimtare rreth njohjes së luftës dhe gjenocidit dhe dënimit të fajtorëve. Kosovës nuk i duhet një gjykatë raciste (vetëm për shqiptarët), tha Meliza Haradinaj.

Në mënyrë retorike, Meliza Haradinaj ka pyetur se kur Kosova do ta ndërtojë besimin “për të cilin dëshpërimisht ka nevojë”.

Më pas, ajo ka lavdëruar qëndrimin e partisë së kryeministrit Haradinaj, Aleancës për Ardhmërinë e Kosovës, rreth Gjykatës Speciale, të cilën e kishte kundërshtuar që nga koha kur ishte dhënë ideja për themelimin e saj, përfshirë edhe me votë në Kuvend kur ajo ishte miratuar.

“AAK asnjëherë nuk ka dështuar që të përkushtohet në konsolidimin e një shoqërie të lirë dhe të barabartë në Kosovë, duke ndërtuar institucione solide shtetërore, pavarësinë dhe forcimin e pozitës rajonale dhe ndërkombëtare të Kosovës”, tha Meliza Haradinaj.

Nisma për shfuqizimin e kësaj gjykate, mandati të cilës është t’i gjykojë krimet e pretenduara se janë kryer nga ish pjesëtarët e UÇK-së, ka ngjallur reagime të ashpra nga përfaqësuesit diplomatikë në Kosovë. Ambasadori amerikan Greg Delawie dhe ai britanik, Ruairi O’Connell, ishin më të zëshmit në kërkesat e tyre për ta zmbrapsur këtë ide duke paralajmëruar pasoja për Kosovën në rast se propozimi i deputetëve shkon përpara.

Sot gjatë ditës, kryeministri Haradinaj ka thënë se Specialja do t’ia rëndojë imazhin Kosovës.

http://kallxo.com/haradinaj-specialja-tia-rendoje-kosoves-imazhin/