Gjykata Vendosi për të Dyshuarin për Sulm Ndaj Gazetarit të KALLXO.com

Gjykata Themelore e Gjilanit ka vendosur që personit me inicialet M.N., i cili dyshohet se e ka sulmuar, fyer e kërcënuar gazetarin e KALLXO.com, Taulant Osmani, t’i caktohet masa e ndalimit për t’iu afruar vendit apo personit të caktuar.

Sipas zyrtarit për informim të Gjykatës Themelore në Gjilan, Sabit Shkodra, prokuroria ka kërkuar që për të dyshuarin të merret masa e arrestit shtëpiak.

Por kjo kërkesë është hedhur poshtë nga Gjykata Themelore.

Gazetari Taulant Osmani ishte sulmuar të shtunën në Gjilan, përderisa po përcillte një protestë të shoqërisë civile kundër zhvendosjes së një përmendoreje nga qendra e qytetit.

“Kërkesa e Prokurorisë Themelore te Gjilanit ka qenë masa e arrestit shtëpiak. Është refuzuar kërkesa e prokurorisë, është caktuar masa e ndalimit për t’iu afruar vendit apo personit te caktuar”, tha Shkodra.

Kryeprokurori, Jetish Maloku, pak orë më parë tha për KALLXO se do të kërkohet masë e paraburgimit ndërsa shtoi se janë duke kërkuar edhe personin e dytë të involvuar në këtë rast, pasi që ky i fundit është në arrati.

Ai shtoi se në momentin që të zbulohet vendndodhja e tij, i dyshuari i dytë do arrestohet dhe do të dërgohet në mbajtje për 48 orë.

Sulmi ndaj gazetarit Taulant Osmani qe dënuar të shtunën nga Asociacioni i gazetarëve të Kosovës dhe kryetari i komunës së Gjilanit, Lutfi Haziri.

http://kallxo.com/agk-kerkon-te-hetohet-sulmi-ndaj-taulant-osmanit/

http://kallxo.com/lutfi-haziri-denon-sulmin-ndaj-taulant-osmanit/