'Festa' e Pensionistëve pa Pensione
Kontributet e dhëna të punëtorëve të cilët u pensionuan rreth viteve të 90-ta, mbetën pa u shpaguar në pleqërinë e tyre.
Edhe sot, në prag të 10 vjetorit të Pavarësisë së Kosovës, pensionistët kosovarë marrin një pension që nuk përkon me kontributim e tyre në vitet e punës , pasi fondi pensional i asaj kohe ka mbetur në Serbi.
Menjëherë pas luftës, pensionistëve kosovarë të cilëve iu ndërpre pensioni i rregullt nga Serbia, morën një lloj asistence sociale nga institucionet e atëhershme të shtetit.
Këto padrejtësi shtyen që disa prej këtyre pensionistëve të ndjekin rrugën ligjore për të marrë atë që u takon.
Shaban Kelmendi nga Mitrovica është njëri nga ata mijëra pensionistë shqiptarë që kanë paguar me rregull kontributet pensionale para luftës.
Pasi që nuk gjeti zgjidhje në asnjërën nga gjykatat e Serbisë, më 11 qershor të vitit 2009, Shaban Kelmendi i është drejtuar Gjykatës së Strasburgut ku edhe fitoi rastin.
Rrugën juridike për sigurimin e pensionit e kishte ndjekur edhe Mahmut dhe Lutvije Grudiqi nga Serbia.
Në vitin 2012, çifti Grudiq nga Mitrovica, pasi i ka shtjerrë të gjitha mjetet juridike në Serbi, i është drejtuar Gjykatës së Strasburgut. Më 17 prill 2012, Gjykata e Strasburgut merr vendim në favor të çiftit Grudiq.
Në këtë emision Zyra e Edita Tahirit, ministres për Dialog, deklaruan se ka kërkuar në vitin 2011 që në tryezën e negociatave në Bruksel mes Kosovës e Serbisë të ngritet edhe kjo temë. Një gjë e tillë ishte refuzuar nga ndërmjetësi Robert Kooper.
Mirëpo edhe sot, dy vite pas me një udhëheqës të ri të dialogut, Avni Arifi nuk ka shumë shpresa për ngritjen e kësaj çështje në dialog.
I pyetur nga KALLXO.com, Arifi tha se fokusi është në implementimin e marrëveshjeve të arritura dhe nuk dihet nëse çështja e pensioneve do të ngritet ndonjëherë.
“Në këto 5 muaj ( të Qeverisë) mundem me e konfirmu që nuk jemi marrë me borxhet që i ka Serbia ndaj qytetarëve”, tha ai.
