OBSH: Rastet globale të kancerit do të rriten me 77% deri në vitin 2050

Diagnozat globale të kancerit do të arrijnë në 35 milionë në vitin 2050, sipas vlerësimeve të reja nga Organizata Botërore e Shëndetësisë – një rritje prej 77% nga 20 milionë rastet e diagnostikuara në vitin 2022, shkruan sot CNN, bazuar në të dhënat më të fundit nga Organizata Botërore e Shëndetësisë, OBSH.

Të dhënat e publikuara të premten nga Agjencia Ndërkombëtare për Kërkimin e Kancerit të OBSH-së, mbulojnë 185 vende dhe 36 forma të sëmundjes. Studiuesit zbuluan se kanceri i mushkërive ishte forma më e zakonshme në mbarë botën në vitin 2022 – përgjegjës për 2.5 milionë raste, 12.4% e totalit – i ndjekur nga kanceri i gjirit femëror, kolorektalit, prostatës dhe stomakut. Kanceri i mushkërive ishte gjithashtu përgjegjës për shumicën e vdekjeve nga kanceri: 1.8 milionë, ose pothuajse 19% e totalit.

OBSH i citon gjithashtu pabarazitë në barrën e kancerit në vendet e zhvilluara. Për shembull, në vendet me një Indeks shumë të lartë të Zhvillimit Njerëzor – një masë e arritjeve në shëndetësi, arsim dhe standard të jetesës – 1 në 12 gra do të diagnostikohet me kancer gjiri dhe 1 në 71 do të vdesë prej tij. Në vendet me Indeks të ulët, vetëm 1 në 27 gra do të diagnostikohet me kancer gjiri, por 1 në 48 do të vdesë prej tij, kryesisht për shkak të diagnostikimit të vonë dhe mungesës së qasjes në trajtime.

Pabarazi u panë edhe në shërbimet e kancerit si rrezatimi dhe transplantimi i qelizave staminale.

“Anketa e re globale e OBSH-së hedh dritë mbi pabarazitë e mëdha dhe mungesën e mbrojtjes financiare për kancerin në mbarë botën, me popullsinë, veçanërisht në vendet me të ardhura më të ulëta, të paaftë për të hyrë në bazat e kujdesit ndaj kancerit”- bëjnë të ditur të dhënat e publikuara nga OBSH. Studiuesit vënë në dukje disa faktorë të tillë si nxitja e rritjes së pritshme në normat e kancerit, të tilla si obeziteti, përdorimi i duhanit dhe përdorimi i alkoolit, si dhe faktorët mjedisorë si ndotja e ajrit.

Në Shtetet e Bashkuara, numri i njerëzve që vdesin nga kanceri vazhdon të bjerë ndërsa shkalla e incidencës së formave të caktuara të sëmundjes rritet, sipas një raporti të publikuar muajin e kaluar nga Shoqata Amerikane e Kancerit.

Nga viti 1991 deri në vitin 2021, vdekjet nga kanceri në SHBA ranë me 33%, kryesisht për shkak të rënies së përdorimit të duhanit, zbulimit të hershëm dhe përmirësimeve të mëdha në trajtime. Megjithatë, pabarazitë racore vazhdojnë, me njerëzit me ngjyrë që përballen me rreziqe më të larta.

Pacientët me kancer po bëhen gjithashtu më të rinj, vuri në dukje raporti i Shoqatës Amerikane të Kancerit. Për shembull, përqindja e diagnozave të kancerit kolorektal te të rriturit nën 55 vjeç, u rrit nga 11% në vitin 1995 në 20% në 2019-ën, ka zbuluar një studim i mëparshëm.

Pavarësisht progresit që është bërë në zbulimin e hershëm të kancerit dhe trajtimin dhe kujdesin e pacientëve me kancer – pabarazi të konsiderueshme në rezultatet e trajtimit të kancerit ekzistojnë jo vetëm midis rajoneve me të ardhura të larta dhe të ulëta të botës, por edhe brenda vendeve. Vendi ku jeton dikush nuk duhet ta përcaktojë nëse ai jeton. Ekzistojnë mjete për t’u mundësuar qeverive që t’i japin përparësi kujdesit ndaj kancerit dhe për të siguruar që të gjithë të kenë qasje në shërbime cilësore dhe të përballueshme./CNN

Përgatiti: Nuhi Shala