Vrasja e 18 vjeçares, Gjykata merr këtë vendim ndaj Dardan Krivaqës
Dardan Krivaqa, i dyshuari kryesorë për vrasjen mizore të 18 vjeçares Marigona Osmani, pritet të qëndrojë 30 ditë në paraburgim.
Kjo pasi Gjykata e Ferizajt e ka aprovuar kërkesën e prokurorisë për caktimin e paraburgimit ndaj Krivaqës.
Tutje sipas kërkesës se Prokurorisë i dyshuari Krivaqa, për motive gjelozie me dashje dhe në mënyrë mizore ka ushtruar dhunë psiqike dhe fizike deri sa e ndjera ka ndërruar jetë.
Gjithnjë sipas Prokurorisë, i dyshuari tjetër Arbër Sejdiu ka kontribuar në mënyrë të drejtpërdrejtë në vrasjen e Marigona Osmanit, pasi gjatë gjithë kohës ka qenë në vendin e ngjarjes dhe ka marrë pjesë në ushtrimin e dhunës psiqike dhe fizike ndaj saj.
Për veprën me të cilën ngarkohet Dardan Krivaqa, dënimi minimal sipas Kodit Penal të Kosovës është 10 vite e deri në dënim me burgim të përjetshëm.
Kallxo.com raportoi dje se Dardan Krivaqa, i dyshuari kryesor për vrasjen e 18 vjeçares në Ferizaj, është i dënuar për një incident të ndodhur në dhjetor të vitit 2020.
Ai kishte pranuar fajësinë se i kishte vënë thikën në fyt duke i shkaktuar lëndime të dëmtuarit Z. H., por ky aktgjykim ndaj tij nuk është i plotfuqishëm.
Dosja e Gjykatës sqaron se i dëmtuari kishte dashur t’i lajmërojë policinë të dyshuarit pasi kishte dyshime që ai po konsumonte drogë, e Dardan Krivaqa menjëherë e kishte kapur për qafe dhe i kishte vënë thikën në fyt duke i shkaktuar gërvishtje në anën e majtë të qafës.
Për këtë vepër penale gjykata e shkallës së parë i kishte shqiptuar dënim me burgim prej 180 ditësh, dhe aty i ishte llogaritur edhe koha e kaluar në paraburgim, ndërsa pjesa tjetër e dënimit i ishte shndërruar në punë në dobi të përgjithshme prej 180 orëve.
Gjykata me rastin e shqiptimit të dënimit kishte matur rrethanat lehtësuese dhe rënduese.
Si rrethanë veçanërisht lehtësuese gjykata kishte konstatuar faktin se i pandehuri e kishte pranuar fajësinë në shqyrtim fillestar, rrethanë tjetër lehtësuese pendimin e sinqertë dhe real për veprën e kryer, dhe faktin se i akuzuari është në përkujdesje të nënës së tij.
Dosja e Prokurorisë: Dardan Krivaqa dyshohet për vrasje në mënyrë mizore
