Serbia kërkon ekstradimin e ish-luftëtarit të UÇK-së

Prokuroria Serbe për Krimet e Luftës i tha BIRN të enjten se dyshon se ish-anëtari i Ushtrisë Çlirimtare të Kosovës, Tomor Morina, është i dyshuar për përfshirje në krime lufte kundër civilëve në rajonin e Gjakovës nga janari deri në qershor 1999.

Morina u arrestua në Maqedoninë e Veriut të mërkurën në një urdhër serb.

“Tomor Morina akuzohet, së bashku me dhjetë anëtarë të të ashtuquajturit grupi ‘Cipat’ të policisë ushtarake të Ushtrisë Çlirimtare të Kosovës, për kryerjen e vrasjeve të civilëve dhe shkaktimin e lëndimeve të rënda trupore, si dhe torturimin, trajtimin çnjerëzor, ndalimin e paligjshëm dhe vjedhjen e pronës civile në periudhën prej 30 janarit deri në mesin e qershorit të vitit 1999 në komunën e Gjakovës,” tha Zyra e Prokurorisë së Krimeve të Luftës.

Ministria Serbe e Drejtësisë tha për BIRN se “zyrtarisht është njoftuar për arrestimin e Tomor Morinës nga autoritetet e Maqedonisë së Veriut” dhe se do të dërgojë një kërkesë për ekstradim.

Autoritetet maqedonase nuk kanë bërë asnjë deklaratë për rastin deri më tani.

Ministri i Jashtëm i Kosovës Behgjet Pacolli kritikoi arrestimin dhe tha se ai pret që Maqedonia e Veriut ta lirojë së shpejti Morinën.

“Arrestimet politike të Serbisë kundër luftëtarëve të lirisë së UÇK-së nuk kanë kuptim, as nuk kanë baza ligjore,” shkroi Pacolli në Facebook të mërkurën.

“Ne besojmë se lirimi dhe kthimi i tij në familjen e tij do të ndodhë së shpejti. Kosova dhe Maqedonia e Veriut kanë një miqësi dhe partneritet të ngushtë dhe ne do ta zgjidhim këtë çështje si partnerë,” shtoi ai.