Foto: Kallxo.com
Gjakovë, gjykata refuzon kërkesën e avokatit për aktakuzën për 18 qese me marihuanë e heroinë
Avokati Masar Vula kërkoi sot në gjykatë që aktakuza ndaj klientit të tij Besnik Shotani, të hedhet poshtë por gjykata e refuzoi këtë kërkesë.
Për pasojë, Shotani do të vazhdojë të gjykohet në akuzën për 18 qese të marihuanës të cilat Prokuroria në Gjakovë thotë se i janë gjetur në posedim.
Besnik Shotani, i akuzuar nga Prokuroria për blerje e shitjes të drogës, duke kundërshtuar një akuzë të tillë tha se drogën e kishte blerë nga personat “Beli dhe Valoni”.
Por avokati Vula tha se aktakuza është e mangët.
Ndërsa prokurorja Ardita Beqiraj Hyseni tha se kjo aktakuzë është e qëndrueshme dhe me bazë.
Gjykatësi i tastit Shaqir Zika, refuzoi kërkesën për hudhjen e aktakuzës, për shkak të mospërmbushjes së kushteve ligjore të saj.
Shotani ishte deklaruar i pafajshëm, duke kundërshtuar që e kishte shitur drogën.
Gjakovë, i akuzuari mohon se 18 qeset me drogë i kishte për shitje
Aktakuza thotë se Shotanit i është gjetur marihuanë dhe heroinë.
Sipas aktakuzës, në dhomën e tij të gjumit, Policia kishte gjetur 4 qese të mbushura me marihuanë dhe 14 të tjera me heroinë.
Aktakuza shpjegon se qeset e marihuanës kanë peshuar 30.59 gram, ndërsa ato të heroinës 3.12 gram.
Për këto, Prokuroria po e akuzon Shotanin për veprën penale të blerjes, posedimit, shpërndarjes dhe shitjes së paautorizuar të narkotikëve.