Zëvendësministrja e Punëve të Jashtme ukrainase falënderon Kosovën për rreshtimin në anën e Ukrainës

Zëvendësministri i Punëve të Jashtme dhe Diasporës, Kreshnik Ahmeti ka njoftuar se ka telefonuar homologen e tij ukrainase Emine Dzhaparova.

Ahmeti ka thënë se e ka njoftuar Dzhaparovan për rreshtimin e Kosovës në përkrahje të pavarsisë dhe integritetit territorial të Ukrainës si dhe i ka përmendur sanksionet të cilat Kosova i ka vendosur ndaj Rusisë.

“Përmenda sanksionet të cilat Kosova tashmë i ka vendosur dhe gatishmërinë tonë për t’i shtuar ato në koordinim me ShBA-të, BE-në dhe partnerët e tjerë ndërkombëtare”, ka shkruar ai.

Ahmeti tha se e ka informuar zëvendësministren edhe për ndihmën që Kosova po e ofron në këtë situatë, përfshirë strehimin e 20 gazetarëve dhe mijë refugjatëve.

“Gjithashtu, e njoftova edhe për ndihmën që Republika e Kosovës po e ofron në këtë situatë duke strehuar 20 gazetarë, duke larguar përkohësisht regjimin e vizave për qytetarët ukrainas dhe duke treguar gatishmëri për strehimin e 5000 refugjatëve”, ka thënë Ahmeti.

Sipas njoftimit të Ahmetit, zëvendësministrja e Punëve të Jashtme të Ukrainës, Emine Dzhaparova e ka falënderuar Kosovën për mbështetjen ndaj Ukrainës dhe gjithashtu ka treguar edhe për situatën e krijuar nga agresioni rus.

“Znj. Dzhaparova falenderoi Republikën e Kosovës për mbështetjen dhe për rreshtimin e menjëhershëm në anën e Ukrainës. Nga Ukraina ajo më njoftoi për situatën e rëndë humanitare të shkaktuar nga agresioni ushtarak i Federatës Ruse dhe për rezistencën e fortë që po e bëjnë ukrainasit”, njofton Ahmeti.

Po astu sipas njoftimit, është theksuar edhe kriza huanitare në Mariupol, ku qytetarët po mbahen peng nga rrethimi rus.

“Kriza humanitare e shkaktuar nga Federata Ruse, veçanërisht në qytete si Mariupol ku qytetarët po mbahen peng nga rrethimi rus, po thellohet çdo ditë e më shumë”, ka treguar Ahmeti.

Me 94 vota për, asnjë kundër dhe asnjë abstenim, Kuvendi i Kosovës kishte miratuar Rezolutën për mbështetjen e Ukrainës dhe popullit të saj në rezistencë ndaj agresionit rus.

Rezoluta e miratuar përmban këto pika:

Kuvendi i Republikë së Kosovës e dënon në mënyrë të ashpër agresionin dhe invazionin e paligjshëm, të pa provokuar dhe të pa justifikuar ushtarak të Federatës Ruse ndaj Ukrainës si dhe përfshirjen e Bjellorusisë në këtë agresion;
Kuvendi i Republikë së Kosovës renditet krahas aleatëve perëndimorë në mbështetje të Ukrainës dhe të popullit të saj si dhe kundërshton fuqishëm qasjen dhe sjelljen e pak vendeve të rreshtuara krah agresionit dhe terrorit rus ndaj Ukrainës nisur nga fqinji ynë verior Seribia;
Kuvendi i Republikë së Kosovës e mbështetë popullin dhe institucionet e Ukrainës si dhe e dënon vrasjen e civilëve dhe të fëmijëve, gjithashtu përshëndesim fillimin e hetimeve nga Gjykata Ndërkombëtare Penale për krime lufte dhe mbështesim dërgimin e rastit nga Ukraina në Gjykatën Ndërkombëtare të Drejtësisë;
Kuvendi i Republikë së Kosovës e mbështetë vendosjen e sanksioneve ekonomike dhe politike nga Qeveria e Republikës së Kosovës ndaj Federatës ruse, në linjë me sanksionet e vendosura nga Bashkimi Evropian, Shtetet e Bashkuara të Amerikës dhe të gjitha vendet demokratike;
Kuvendi i Republikë së Kosovës i kërkon Qeverisë së Republikës së Kosovës që krahas gatishmërisë për strehimin e 20 gazetarëve ukrainas, t’i koordinojë të gjitha veprimet e mëtejshme me partnerët ndërkombëtar si dhe të shprehë gatishmërinë edhe për strehimin eventual të deri 5000 refugjatëve nga Ukraina;
Kuvendi i Republikë së Kosovës i kërkon Qeverisë së Republikës së Kosovës që të ndajë një fond të veçantë për ndihmë ndaj popullit ukrainas, sipas koordinimit ndërmjet dy Qeverive respektive, Kosovës dhe Ukrainës;
Kuvendi i Republikë së Kosovës kërkon nga Qeveria e Republikës së Kosovës që në koordinim me partnerët ndërkombëtar të ndërmarrë menjëherë të gjitha veprimet e nevojshme për dorëzimin e kërkesës për anëtarësim të Republikës së Kosovës në NATO, Bashkim Evropian, Këshill Evropian dhe organizata tjera të rëndësishme ndërkombëtare;
Kuvendi i Republikë së Kosovës i bën thirrje NATO-s, Bashkimit Evropian, Këshill të Evropës dhe organizatave të tjera ndërkombëtare, ta shqyrtojë kërkesën dhe të konsiderojnë rëndësinë për anëtarësimin në to të Republikës sonë;
Kuvendi i Republikë së Kosovës ju bën thirrje vendeve të BE-së të cilat ende nuk e kanë njohur pavarësinë e Republikës sonë që në harmoni me vendimin e Gjykatës Ndërkombëtare të Drejtësisë për shpalljen e pavarësisë së Kosovës, ta ndërmarrin sa më parë këtë akt politik, pra njohjen e Republikës së Kosovës si shtet i pavarur dhe sovran e që është edhe në funksion të paqes dhe stabilitetit në rajon dhe në BE;
Kuvendi i Republikë së Kosovës i kërkon Qeverisë së Republikës së Kosovës që në konsultim me misionin e NATO-s në Kosovë ta rishikojë dhe të shkurtojë afatet e parapara të planit 10 vjeçar të vitit 2018 për avancimin e FSK-së në ushtri të rregullt, përfshirë këtu edhe sigurimin, mbështetjen financiare të nevojshme për këtë qëllim;
Kuvendi i Republikë së Kosovës e udhëzon Kryetarin e Kuvendit që në koordinim me Qeverinë dhe partnerët ndërkombëtarë t’i drejtohen institucioneve më të larta shtetërore të Spanjës, Rumanisë, Sllovakisë, Greqisë dhe Qipros me kërkesën për ta njohur pavarësinë e Republikës së Kosovës sa më parë duke dhënë kështu kontribut në funksion të paqes dhe stabilitetit në rajon dhe në BE;
Kuvendi i Republikë së Kosovës duke e marrë parasysh aspiratat tona të përbashkëta për anëtarësim në Bashkimin Evropian dhe konosolidimin e demokracisë dhe sigurisë në rajon e fton Parlamentin e Republikës së Shqipërisë, Parlamentin e Republikës së Maqedonisë së Veriut atë të Malit të Zi si dhe Parlamentin e Bosnjës dhe Hercegovinës të bashkohen në këtë nismë dhe t’i shprehin asaj mbështetje.