Votat që i duhen VV-së për ta rrëzuar Hotin nga qeveria

Ka kaluar vetëm dy muaj e tre ditë që prej kur Avdullah Hoti u ngjit në krye të qeverisë. Por, shumë shpejt ai mund të shkarkohet nga kjo pozitë nëse mocioni i mosbesimit i inicuar sot nga Lëvizja Vetëvendosje rezulton i suksesshëm.

Sot, partia Lëvizja Vetëvendosje nisi edhe zyrtarisht mbledhjen e nënshkrimeve për rrëzimin e qeverisë Hoti.

Këtë e bënë të ditur Arbërie Nagavci dhe Rexhep Selimi nga holli i Kuvendit të Kosovës.

Qeveria që drejton Avdullah Hoti i LDK-së u votua më 3 qershor. Isa Mustafa, si kryetar i LDK-së lidhi marrëveshje për bashkëqeverisje me AAK-në e Ramush Haradinajt, Nismën e Fatmir Limajt, Listën Serbe dhe pakicat tjera në Kuvend të Kosovës.

Por, edhe pse LDK lidhi koalicion me disa parti, nuk arriti më shumë se 61 vota t’i ketë në Parlament. Madje, njëra nga to u kontestua. Deputeti nga komunitet jo shumicë, Etem Arifi, aktualisht është duke u kërkuar për ta vuajtur një dënim. Ndërkohë, edhe një votë tjerë, ajo e deputetit Haxhi Shala, erdhi vetëm pasi presidenti i vendit, Hashim Thaçi dhe ish-kryeministri i Kosovës, Ramush Haradinaj, i shkuan në shtëpi për t’ia kërkuar votën.

E në rast se Lëvizja Vetëvendosje dëshiron të ketë një mocion të sukseshëm mosbesimi ndaj qeverisë Hoti duhet t’i mbledhë të paktën 61 vota.

Por paraprakisht, VV-së i duhet t’i gjejë edhe 10 vota tjera për ta dërguar mocionin në Kuvend meqë ngritja e mocionit të mosbesimit ndaj qeverisë kërkon 40 vota të deputetëve.

Deri më tani, Partia Demokratike e Kosovës, si parti opozitare, nuk ka shprehur qëndrim të qartë nëse do ta përkrah mocionin e iniciuar nga LVV.

“Jam njoftuar që e kanë drejtuar një shkesë Vetëvendosja në Grupin Parlamentar të PDK-së. Nuk e di nëse më herët ka mbërri shkresa apo është mbajtë konferenca, duhet me saktësua. Të njëjtën do ta shqyrtojmë në strukturat e partisë dhe pastaj pas diskutimeve brenda organeve të partisë, do të kemi një qëndrim”, tha Bedri Hamza, shef i Grupit Parlamentar të PDK-së në një bisedë për KALLXO.com.

Mbrëmë, në një intervistë për RTV Dukagjini, nënkryetari i PDK-së, Uran Ismaili, tha se LVV duhet të inicojë mocionin e mosbesimit ndaj qeverisë Hoti, por nuk dha një shpjegim konkret nëse partia e tij do ta përkrah atë.

LVV në Kuvendin e Kosovës aktualisht numëron 30 deputetë. Ndërsa, PDK 24. Së bashku, bëjnë 53 vota, që janë të pamjaftueshme për rrëzimin e qeverisë.

Qeveria paraprake të cilës i printe Albin Kurti u rrëzua me një mocion të mosbesimit që e nisi pikërisht LDK që bashkëqeveriste.

PDK flet për mocionin e nisur nga VV për rrëzimin e Qeverisë Hoti