Thaçi: Do ta respektoj vendimin e Gjykatës Kushtetuese
Presidenti i vendit, Hashim Thaçi është deklaruar pas vendimit të Gjykatës Kushtetuese e cila aprovoi kërkesën e Lëvizjes Vetëvendosje për masë të përkohshme lidhur me dekretin e presidentit që mandatoi Avdullah Hotin për kryeministër të ardhshëm.
Thaçi u shpreh se Kosova do ta respektojë në plotëni këtë vendim dhe që sipas tij, tashmë shteti kosovar ka një përvojë të çmueshme në respektimin e të gjitha vendimeve dhe aktgjykimeve të Gjykatës Kushtetuese.
“Sapo u njoftova për vendimin e Gjykatës Kushtetuese të Republikës së Kosovës. Si President i Republikës së Kosovës do ta respektoj në plotëni këtë vendim. Kosova ka tashmë një përvojë të çmueshme në respektimin e të gjitha vendimeve dhe aktgjykimeve të Gjykatës Kushtetuese. Kjo përvojë është një dëshmi e fuqishme e sundimit të ligjit në Republikën e Kosovës”, u shpreh presidenti në rrjetin social Facebook.
“Si President i Republikës së Kosovës i ftoj të gjithë politikanët dhe subjektet politike në vend, që të sillen me maturi në respektim të Kushtetutës së Republikës së Kosovës”, ka shkruar Thaçi.
Gjykata Kushtetuese e ka aprovuar kërkesën e Lëvizjes Vetëvendosje për masë të përkohshme lidhur me dekretin e presidentit Hashim Thaçi që mandatoi Avdullah Hotin për kryeministër të ardhshëm.
Sipas Kushtetueses, vendimi për masën e përkohshme është deri më 29 maj 2020.
Të enjten, Lëvizja Vetëvendosje dërgoi kërkesën për masë të përkohshme ndaj dekretit të presidentit pak minuta pasi që ky i fundit njoftoi se ka mandatuar Avdullah Hotin për kryeministër.
Presidenti Hashim Thaçi përmes një konferencë për media dje ka njoftuar se ka mandatuar Avdullah Hotin për kryeministër të Kosovës.