Sulmohet ekipi i RTK-së në Zveçan

Ekipi i Transmetuesit Publik, Radio Televizionit të Kosovës – RTK është sulmuar në Zveçan.

Vetura e ekipit është sulmuar nga disa persona të cilët kanë gjuajtur me tulla në drejtim të veturës, si dhe i kanë shpërthyer gomat.

Gazetarja e këtij televizioni, Arbresha Berisha, kameramanët Ilir Uka dhe Bardh Bekteshi, si dhe inxhinieri, Mentor Vinarci kanë qenë pjesë e ekipit që ishte duke raportuar nga atje, por fatmirësisht të njëjtit nuk kanë pësuar lëndime.

Lidhur me rastin ka reaguar edhe Asociacioni i Gazetarëve të Kosovës, i cili ka thënë se këto sulme janë të papranueshme dhe shumë shqetësuese.

“Në një interval prej dy javësh sulmet kanë shënuar ngritje të paprecedentë deri tani” – ka thënë AGK.

Tutje Asociacioni ka ftuar organet e rendit, vendore dhe ndërkombëtare, që të garantojnë siguri për ekipet e mediave, të cilat po raportojnë mbi tensionet në komunat veriore të vendit.

Që nga 26 maji situata është e tensionuar në veri të vendit, kjo pasi qytetarët serb po kundërshtojnë futjen e kryetarëve të rinj në ndërtesat e komunave në Zveçan, Leposaviq e Zubin Potok.

Ekipe të gazetarëve të mediave të ndryshme e vetura të Policisë së Kosovës vazhdimisht janë dëmtuar nga ana e qytetarëve në këtë zonë.

Këto sulme janë bërë edhe në drejtim të ekipeve të KALLXO.com.