Policia e Prokuroria brenda selisë së PD-së, fillon marrja e provave pas protestës (FOTO)

Policia dhe prokurorët janë futur në selinë e Partisë Demokratike në Tiranë, ku ka filluar edhe kryerja e veprimeve procedural dhe këqyrja e ambienteve, ku u zhvillua ngjarja që arriti edhe në përdorimin e dhunës nga protestuesit.

Policia e Shtetit ka njoftuar se në të gjitha ambientet e brendshme të selisë do të bëhet këqyrja dhe do të mblidhet çdo provë e paligjshmërisë që karakterizoi ngjarjen e dhunshme.

“Do të sekuestrohen në cilësinë e provës materiale të gjitha provat, në funksion të hetimit, si dhe do të kryhet me rigorozitet e paanësi të plotë ligjore, çdo veprim procedural i nevojshëm, me qëllim zbardhjen e plotë të të gjithë dinamikës së kësaj ngjarjeje dhe identifikimin e autorëve të përfshirë ne akte dhune, për të garantuar nxjerrjen e tyre pa dallim, para drejtësisë”, thuhet në njoftimin e Policisë së Shtetit.

Gjatë përplasjes për dy orë me radhë mes mbështetësve të Berishës që tentuan futjen në seli dhe mbrojtësve të selisë u përdorën edhe mjete të forta, ndërsa pati edhe të lënduar nga të dyja anët, raporton Abc News.

Pas kësaj, policia ka ndërhyrë në ndihmë të deputetëve që kanë kërkuar ndihmë dhe u bën thirrje protestuesve që të distancohen menjëherë nga aktet e shkatërrimit të pronës dhe aktet e dhunës.

“Policia e Shtetit u bën thirrje organizatorëve të protestës që të  përmbajnë protestuesit dhe të shmangin çdo rast dhune, sepse do përballen me ligjin”, thuhet në njoftimin e Policisë së Shtetit.

“Lufta” Berisha-Basha shpërtheu në 9 shtator 2021, kur Lulzim Basha, me kërkesë të ShBA, pezulloi Sali Berishën nga grupi parlamentar i PD-së, për shkak se ishte shpallur non grata nga DASh për korrupsion madhor, shantazh ndaj drejtësisë dhe minim të demokracisë.