Kryetari i Komunës së Vitisë, Sokol Haliti | Foto: Atdhe Mulla
Me verëra e mish, dreka për përurimin e objektit të ri të Komunës, Vitisë i kushtoi mbi 379 euro
Mishi e alkooli vazhdojnë të jenë pjesë e tryezës së darkave dhe drekave zyrtare të Komunës së Vitisë.
KALLXO.com ka siguruar faturat e drekave dhe darkave zyrtare të Komunës së Vitisë për periudhën e viteve 2019, 2020.
Në disa nga këto fatura, me buxhet të Komunës janë paguar edhe pije të ndryshme alkoolike.
Një ndër to është edhe fatura e datës 7 nëntor 2019 në të cilën, Komuna e Vitisë kishte përuruar objektin e ri komunal.
Dreka zyrtare në të cilën kishin qenë të pranishëm ish – ministrja e Administrimit të Pushtetit Lokal, Adrijana Hoxhiq dhe shefi i Seksionit të Bashkëpunimit të Bashkimit Evropian në Kosovë, Luigi Brusa.
Kjo drekë buxhetit të Komunës së Vitisë, i kishte kushtuar plot 379 euro.
Brusketat, byfteku, sallata e kombinuar si dhe ushqimet e tjera në këtë drekë, ishin shoqëruar me 4 vera të kuqe të cilat kishin kushtuar 60 euro.
Në fund të drekës, të pranishmit kishin pirë kafe të cilën e kishin shoqëruar me ëmbëlsirë të llojit, trileqe.
Traditën e pritjes me alkool e mish, Komuna e Vitisë e ka vazhduar edhe në vitin 2020, kur në mesin e pandemisë kryetari i Komunës së Vitisë, Sokol Haliti e kishte pritur ministren e Kulturës, Vlora Dumoshi.
Dreka për të cilën kishte raportuar KALLXO.com kishte kushtuar 452 euro.
