Këshilli i Etikës nuk merr vendim për Xhevat Krasniqin, aktivistët bllokojnë hyrjen e Administratës Qendrore të UP-së - VIDEO
Këshilli i Etikës nuk ka marrë as sot vendim në lidhje me rastin e profesorit Xhevat Krasniqi, i denoncuar për ngacmime seksuale nga 27 studente të Fakultetit të Mjekësisë të Universitetit ‘Hasan Prishtina’.
Pasi që Këshilli nuk mori vendim, aktivistë të Lëvizjes Feministe Studentore kanë bllokuar hyrjen e Admnistratës Qendrore të UP-së, duke mos lejuar daljen nga objekti të anëtarëve të Këshillit.
Xhevat Krasniqi pasi ka përfunduar deklarimin e tij, anëtarët e Këshillit të Etikës e kanë pyetur atë rreth vlerësimit që ka bërë në lëndën e tij dhe për disa prej deklaratave të studenteve që kanë raportuar ngacmimin.
Për një studente, Krasniqi tha se në protestë është shpreh që “m’ka ngacmu” mirëpo sipas tij “nënshkrimin s’e ka fare në ankesë”.
Rreth shprehjes e cila është deklaruar nga 27 studentet e Mjekësisë se Krasniqi i ka pyetur se “çka ki nën fustan”, ai ka thanë se i pyet pasi dyshon se kopjojnë.
“M’pyesin – Ai ke thanë ti studentes çka ki nër fustan?, kurrë s’e kam thanë. Ka ndodhë – çka ki aty, e qet telefonin, t’u kopju. Krejt këmbët i shkruajnë me formula të matematikës, edhe duart” – ka thënë Krasniqi.
Krasniqi ka përmendur rreth gjashtë profesorë të Matematikës që kanë ligjëruar më herët në Mjekësi.
Këshilli i Etikës e ka pyetur se cilët janë arsyet e largimit të këtyre profesorëve, sipas tij.
“Në mesin e tyre një profesor që ka qenë kogja gjatë aty, vjen në një pozitë që studentët i pyt me detyra të klasës pestë. Kot është sepse ata dojnë m’i vendos notat veç qysh dojnë ata” – ka deklaruar Krasniqi.
Këshilli i Etikës e ka pyetur se a mund të konstatohet pretendimi i tij se kjo është një fushatë për largimin e tij nga Universiteti i Prishtinës.
Rreth kësaj, Krasniqi tha se e ka të vështirë ta dijë se çka mendojnë të tjerët.
Kurse, për deklaratat e studenteve që e kanë denoncuar se ai i ka komentuar për dukjen dhe veshjen e tyre, ai e ka mohuar se e ka bërë këtë.
“Nuk është e natyrës sime m’i komentu veshjet ose dukjet” – ka thënë Krasniqi.
Ai po ashtu e ka mohuar se i ka shikuar studentet nga majat e gishtave deri në kokë, siç kanë raportuar studentet dhe dëshmitarët se kishte vepruar kështu Krasniqi gjatë ligjëratave në Mjekësi.
Këshilli i Etikës ka vazhduar ta pyesë se a ka pasur studentë tjerë prezentë kur pretendohet se është thënë fjala “masazh” ndaj nji studentje nga ana e tij.
“Po çfarë masazhe po flitet aty, po na e kem detyrë zyrtare. Në asnjë mënyrë, aty thotë, njihere jena kanë vetëm, tani dalim dy-tre dëshmitarë. Në asnjë mënyrë s’ka ndodhë ajo hiç” – tha Krasniqi.
Më tej, nga Këshilli i Etikës thanë se kanë parë disa vlerësime të performancës së tij si profesor që u ka sjellur Fakulteti i Edukimit dhe se për degën e Farmacisë në Mjekësi, nga ku është raportuar për ngacmim, ai u kishte premtuar se do t’i sjellte raportet e vlerësimit të studentëve.
Krasniqi tha se nuk e ka dëgjuar se do t’i sillte raportet e vlerësimit të studentëve të Farmacisë.
“Vazhdimisht vlerësimi për mua ka fillu me ra, po edhe studentët me njohuri nga matematika kanë ardhur më të varur” – tha Krasniqi.
“Te Fakulteti i Edukimit, aty 85% vlerësimi është pozitiv (nga studentët)” – tha Krasniqi.
Sa i përket çështjes që është raportuar se Krasniqi i ka mbajtur konsultimet me derën hapur, Krasniqi ka shpjeguar se në çfarë mënyre i mban konsultimet.
“Dal te dera i marr testet sipas asaj rradhe. I thërras – urdhno hyn n’zyre. Qe ku është një kompjuter me zgjidhje të detyrave, krahasoi… në këto raste thom shikoje, nëse studenti e ka punu mirë, i sheh të gjitha detajet”.
“Unë i maj konsultimet për studentë që me pa testin”.
“Në konsultime hyjnë tre, katër, pesë, varësisht prej hapësirës që e kam aty. I shkojmë gjithësecili, i komentojmë me njëri-tjetrin. Edhe ajo dera është e hapur, mund të jetë edhe e mbyllur” – Krasniqi
“Unë e ndiej vetën shumë të pastër, si me thanë (dera) e hapur, si me thanë e mbyllur. Për 12 vjet s’u anku kërkush për mua, qoftë dera e hapur, qoftë dera e mbyllur” – tha Krasniqi.
27 studente të Fakultetit të Mjekësisë, në të cilin Krasniqi jepte lëndën e matematikës si profesor i angazhuar, kanë raportuar se janë ngacmuar seksualisht nga ai.
Lidhur me pretendimet e studenteve se janë ngacmuar seksualisht nga profesori Krasniqi, Fakulteti i Mjekësisë tha më 27.03.2024 se fillimisht ishin informuar gojarisht.
Kurse, denoncimin me shkrim studentet e Fakultetit të Mjekësisë e kishin dorëzuar zyrtarisht më 27.02.2024 në Fakultet.
Pas denoncimit të studenteve, i gjithë menaxhmenti i Mjekësisë, dekan e prodekan, janë mbledhur më 04.03.2024, me ç’rast kanë ftuar edhe profesorin Krasniqi për t’ia kumtuar me gojë denoncimin e studenteve ndaj tij dhe ndërprerjen e bashkëpunimit me të.
Sipas Fakultetit të Mjekësisë, Krasniqi nuk e ka pranuar se i ka ngacmuar seksualisht studentet.
Kallxo Përnime ka publikuar hulumtimin, në të cilin, disa vajza dhe djem rrëfejnë për ngacmimet seksuale që pretendohet se profesori i matematikës, Xhevat Krasniqi i ka bërë ndaj studenteve të mjekësisë.
