Gjykata e Hagës hedh poshtë kërkesën e Ratko Mlladiqit për lirim të përkohshëm
Gjykata e OKB-së për krimet e luftës hodhi poshtë një kërkesë të ish-kreut të Ushtrisë Serbe të Bosnjës Ratko Mlladiq për lirimin e parakohshëm të tij për arsye humanitare ose për ta lejuar atë të vazhdojë ta vuajë dënimin me burgim të përjetshëm në Serbi.
Mekanizmi për Gjykatat Penale Ndërkombëtare ka refuzuar kërkesën e Ratko Mlladiqit, i cili po vuan dënimin me burgim të përjetshëm për gjenocid dhe krime të tjera lufte, për lirim të përkohshëm në Serbi për arsye humanitare për shkak të shëndetit të tij të dobët.
Në një vendim të marrë më 31 maj, por të publikuar në faqen e internetit të gjykatës së krimeve të luftës me bazë në Hagë këtë javë, ajo hodhi poshtë gjithashtu kërkesën e Mlladiqit për ta vuajtur pjesën tjetër të dënimit në Serbi.
Në kërkesën e tij, Mlladiqi pretendoi se sëmundja e tij nuk po trajtohej siç duhet në paraburgim dhe se ai do të merrte një kujdes më të mirë shëndetësor në Serbi. Ai gjithashtu u ankua për pengesën gjuhësore me të cilën përballet aktualisht në paraburgim në Holandë.
Kryetarja e gjykatës Graciela Gatti Santana tha në vendimin e saj se dënimet duhet të kryhen në shtetet me të cilat Kombet e Bashkuara kanë marrëveshje për këtë qëllim dhe se Serbia nuk do të ishte një opsion i zbatueshëm.
“Pasi ka kryer vetëm rreth 13 vjet të dënimit të tij me burgim të përjetshëm, Mlladiqi nuk e ka arritur ende pragun e pranueshmërisë për lirim të parakohshëm”, shtoi ajo.
Mlladiqi, i cili është 82 vjeç, ka pasur disa probleme serioze mjekësore që kur ka qenë në paraburgim në Holandë dhe ka pësuar dy ishemi dhe një atak në zemër. Ai gjithashtu kreu një operacion në zorrën e trashë në 2020.
Avokatët e tij kanë pohuar vazhdimisht se ai nuk ka marrë trajtimin e duhur dhe se problemet e tij shëndetësore janë nënvlerësuar.
Gatti Santana tha se monitorimi i fundit mjekësor i Mlladiqit që ajo mori nga Njësia e Paraburgimit e OKB-së tregonte se gjendja e tij ishte aktualisht e qëndrueshme dhe kishte treguar një përmirësim të dukshëm.
“Bazuar në informacionin që kam para meje, jam e mendimit se rrethanat humanitare të përmendura nga Mlladiqi nuk janë të vërtetuara në këtë fazë dhe se Mlladiqi po merr të gjithë kujdesin e nevojshëm në Njësinë e Paraburgimit të OKB-së. Mendoj se kërkesa për lirim në Serbi duhet të refuzohet”, tha ajo.
Ajo tha gjithashtu se Mlladiqi duhet të pajiset me çdo dosje mjekësore që ai ka kërkuar sa më shpejt të jetë e mundur dhe se ai duhet të vazhdojë të ketë akses në shërbimet e përkthimit në gjuhën e tij.
Mlladiqi u dënua në qershor 2021 për gjenocidin e boshnjakëve nga Srebrenica, persekutimin e boshnjakëve dhe kroatëve në të gjithë vendin gjatë luftës, terrorizimit të popullsisë së Sarajevës me një fushatë granatimesh dhe sulmesh me snajper gjatë rrethimit të qytetit dhe marrjen peng të paqeruajtësve të OKB-së./reporter.al
