Escobar: PD do përballet me pasoja nëse e merr Berisha
I dërguari i posaçëm i SHBA-ve për Ballkanin Perëndimor, Gabriel Escobar, ka bërë të qartë se çdo vendim mbi shpalljen “non grata: për funksionarë të lartë të shteteve të ndryshme, nuk është një vendim politik, por një përpjekje e përbashkët institucionale.
Escobar tha se Sali Berisha është një person i shpallur non grata nga SHBA-të dhe si i tillë funksionarët amerikanë nuk do të takohen me të.
Hetimet për Berishën, siç ka shpjeguar ai, janë një përpjekje e gjatë institucionale dhe sipas tij kjo përpjekje ka qenë e shtrirë edhe gjatë administratës së Donald Trump.
Mbi lidhjet e mundshme të George Soros me vendimin ndaj Berishës, të cilët ky i fundit akuzon dhe i pretendon, Escobar i cilësoi “të rrezikshme”.
“Nuk kanë asnjë bazë. Janë përpjekje institucionale për të ndalur korrupsionin. Ishte një përpjekje kolektive jo individuale”, theksoi ai.
Zëvendësndihmës Sekretari i Shtetit, bëri me dije se sanksione të tjera do të ketë në të gjithë Ballkanin Perëndimor, duke deklaruar ndër të tjera se SHBA-të do të jenë të gatshëm të vendosin në dispozicion të sistemit të drejtësisë dosjet që kanë mbi persona të ndryshëm.
Kështu, shteti i së drejtës, mund të vendoset sa më parë në Shqipëri. Ai tha se shteti i së drejtës është themeli që i nevojitet demokracisë shqiptare. Escobar theksoi se SHBA-të do të ushtrojnë presion publik me sanksione, por që fjala e fundit do t’i takojë gjyqësorit në Shqipëri, që të tregojë veten.
Integrimi në Bashkimin Evropian ka qenë po ashtu një pikë ku ai është ndalur. Funksionari i lartë amerikan i ka mëshuar faktit se drejtimi i vetëm për Tiranën, është unioni. Megjithatë, parë edhe nga skepticizmi, këta të fundit duhet të nxitojnë në pranimin e shteteve ballkanike në bashkësi.
Teksa, mbi bashkëpunimin me Ëashingtonin, ai pretendon se do të vijojnë në disa zëra. Më kryesorët ndër to, bashkëpunimet me karakter ushtarak, ekonomik, arsimor apo kulturor.
“Duam të punojmë me ju për më shumë”, përmbylli ai/TopChannel
