Ambasadori amerikan pas takimit me ministrin Latifi: Vaksinimi dhe masat mbrojtëse janë mbrojtja më e mirë

Ministri i Shëndetësisë, Rifat Latifi, ka pritur në takim ambasadorin e ri të Shteteve të Bashkuara të Amerikës në Kosovë, Jeffrey M. Hovenier me ç’rast e uroi për fillimin e misionit të tij në Kosovë dhe konfirmoi miqësinë mes dy shteteve.

Sipas njoftimit të MSh-së, Hovenier theksoi bashkëpunimin e ngushtë dhe të frytshëm mes dy vendeve dhe nënvizoi mbështetjen e SHBA-së në fushatën e vaksinimit kundër Covid-19 dhe në përmirësimin e shërbimeve shëndetësore edhe përmes bashkëpunimit me organizatat e tjera ndërkombëtare.

Ministri Latifi e informoi Ambasadorin rreth situatës me COVID-19 dhe theksoi se vendi ynë posedon tani sasi të mjaftueshme të vaksinave për të gjithë qytetarët, kurse sistemib shëndetësor është përgatitur për reagim adekuat në rast të rritjes së mëtutjeshme të numrit të të infektuarve dhe spitalizimeve nga COVID-19.

Tutje, Ministri Latifi tregoi edhe për planin konkret të Ministrisë së Shëndetësisë për përmirësimin e shërbimeve shëndetësore tek të gjitha komunitetet në Kosovë edhe përmes aplikimit të Telemjekësisë.

Ambasadori Hovenier ritheksoi se ShBA edhe në të ardhmen do t’i ofrojnë mbështetje Kosovës për arritjen e qëllimeve të saja drejt përmirësimit të kujdesit shëndetësor.

Në anën tjetër, ambasadori amerikan pas takimit shkroi në llogarinë e tij në Twitter së vaksinimi dhe përdorimi i duhur i maskave mbeten mbrojtja më e mirë kundër infeksioneve serioze.

With @MSH_GovKS Minister Latifi reaffirmed our commitment to assist Kosovo in its fight against #COVID19. Vaccination & proper mask use remain the best defenses against serious infection. #MaskUp #SleeveUp #Vaksinohu pic.twitter.com/yI4lyFhez7

— Ambassador Jeff Hovenier (@USAmbKosovo) January 18, 2022