Agjencia e OKB-së thotë se ka pranuar "raporte të besueshme" të diskriminimit në kufirin ukrainas
Organizata Ndërkombëtare për Migracionin, IOM, ka pranuar raporte të besueshme dhe të verifikuara të diskriminimit të përjetuar në kufijtë e Ukrainës nga shtetas të huaj që përpiqen të ikin nga dhuna për shkak të pushtimit të vazhdueshëm të Rusisë, tha të premten për CNN Drejtori i Përgjithshëm i IOM, Antonio Vitorino.
“Ne kemi raporte – raporte të besueshme, raporte të verifikuara – dhe ne po veprojmë me autoritetet në të dyja palët,” tha Vitorino.
“Ne i jemi drejtuar tashmë autoriteteve si në Ukrainë ashtu edhe në vendet fqinje për t’u siguruar që të gjithë ata që po ikin nga Ukraina, pavarësisht nga kombësia, territori i origjinës, ngjyra e lëkurës, të lejohen të kalojnë,” shtoi ai.
Gjatë një interviste për CNN, Vitorino theksoi se të gjithë ata që kërkojnë të ikin nga konflikti “duhet të trajtohen në baza të barabarta”.
Pavarësisht luftës, ekziston përgjegjësia e autoriteteve për ta garantuar mbrojtjen dhe sigurinë e të gjitha qenieve njerëzore. Raketat nuk diskriminojnë sipas kombësisë, ato i godasin të gjithë njëlloj”, tha ai.
Në një raport të botuar të premten, Human Rights Watch tha se dhjetëra shtetas të huaj të intervistuar nga organizata – shumë prej tyre studentë – kishin “zbuluar një model të bllokimit ose vonimit të të huajve nga hipja në autobusë dhe trena”.
“Të huajt që jetojnë në Ukrainë janë përballur me trajtim të pabarabartë dhe vonesa teksa përpiqen të ikin nga lufta së bashku me qindra mijëra ukrainasë”, tha Human Rights Watch.
Studentët e huaj që tentojnë të largohen nga Ukraina i kanë thënë CNN se po përjetojnë trajtim racist nga forcat ukrainase të sigurisë dhe nga zyrtarët kufitarë.
Të mërkurën, Ministri i Jashtëm ukrainas Dmytro Kuleba njoftoi se qeveria ukrainase ka krijuar një linjë telefonike emergjente për studentët e huaj që dëshirojnë të largohen nga Ukraina.
“Ne po punojmë intensivisht për ta garantuar sigurinë e tyre dhe për ta përshpejtuar kalimin e tyre,” shkroi Kuleba në Twitter, duke shtuar se ata që përpiqen ta kalojnë kufirin “duhet të kenë mundësi të barabarta për t’u kthyer në vendet e tyre të sigurta”./CNN
