Rrena se vetura e parkuar në hapësirën e gjelbër është pronë e emisionit “Radar”
Deklarata
Nje shembull per te tjeret! Radar – Radio Dukagjini
Vlerësimi
Rrenë
Përshkrimi “Nje shembull per te tjeret! Radar – Radio Dukagjini” i bërë tek një postim me fotografi në të cilin shihet një veturë e parkuar në hapësirë të gjelbër- është i rremë. Vetura në fjalë nuk është në pronësi dhe menaxhim të Emisioni Radar që transmetohet në RTV Dukagjinit. Nga emisioni “Radar-i” thonë se automjeti është donacion i tyre për organizatën “Cure to Children” për transportin e fëmijëve me Leukemi.
Artikulli
Më 29 dhjetor 2022, në faqen në Facebook “Vrojtuesit e lagjes- Prishtinë” është publikuar një fotografi në të cilën shihet një veturë e parkuar në një hapësirë të gjelbër.
Fotoja është publikuar me mbishkrimin “Nje shembull per te tjeret! Radar – Radio Dukagjini”.
Faqja përmes përshkrimit ka kritikuar dhe ironizuar me mënyrën e parkimit të veturës në hapësirën e gjelbër. Ashtu si pretendon “Vrojtuesit e lagjes- Prishtinë”, automjeti i përket emisionit “Radar” i RTV Dukagjinit.
Informacioni i publikuar nga faqja është i rremë, pasi vetura edhe pse e ka të vendosur logon e Radar-it dhe të RTV Dukagjinit, nuk është në pronësi të tyre.
Në një përgjigje për KALLXO.com nga emisioni “Radar”, ata shpjegojnë se vetura e parkuar në hapësira gjelbëruese nuk është në menaxhim të tyre.
Nga emisioni “Radar-i” thonë se automjeti është donacion i tyre për organizatën “Cure to Children” për transportin e fëmijëve me Leukemi.
“Vetura që shihet e parkuar në hapësira gjelbëruese, nuk i përket emisionit Radar ne RTV Dukagjini, dhe nuk është në menaxhim të Radarit. Kjo veturë është donacion i emisionit Radar për “Cure to Children” për Transportin e fëmijëve me Leukemi”- thuhet në përgjigjen e emisionit për KALLXO.com.
Organizatës “Cure to Children” i ishte dhuruar vetura, për të cilën dëgjuesit e “Radar- it” kishin mbledhur të holla për sigurimin e transportit për fëmijët e prekur me leukemi në gjithë Kosovën.